Governu analiza etapa ikus ba negosiasaun no asinatura akordu nian ho Millennium Challenge CorporationGovernu analiza etapa ikus ba negosiasaun no asinatura akordu nian ho Millennium Challenge Corporation

Ter. 25 janeiru 2022, 15:58h
IMG_6327

Ministru Prezidénsia Konsellu Ministrus, Fidelis Manuel Leite Magalhães, iha loron 25 fulan-janeiru tinan 2022, hala’o sorumutuk iha Palásiu Governu ho Diretór Ezekutivu Nasionál husi Compact Development Team (CDT-TL), Embaixadór Constâncio Pinto, nu’udar responsavel ba ekipa dezenvolvimentu kompaktu nian ba projetu sira dezenvolvimentu nian ne’ebé finansia husi ajénsia norte-amerikana Millennium Challenge Corporation (MCC).

Durante sorumutuk ne’e, analiza ona etapa sira tuirmai ne’ebé sei realiza no ninia kalendáriu, ho objetivu atu prepara negosiasaun kona-ba akordu no programa ba implementasaun projetu nian, ne’ebé sei hala’o iha fulan-marsu oinmai iha Washington, iha Estadus Unidus Amérika. Hein katak asinatura ba kompaktu ne’e sei hala’o iha Dili, iha fulan-maiu ka fulan-juñu hosi tinan ida-ne’e.

Objetivu hosi programa ida-ne’e, ho valór ida maizumenus dolar amerikanu millaun 400 ne’e, atu hamenus insidénsia ba moras sira iha país ne’e, liuhusi hadi’a sistema tratamentu bee-moos nian, saneamentu no drenajen iha Dili, no hodi hadi’a kualidade Ensinu Sekundáriu nian liuhusi estabelesimentu Sentru Formasaun Exelénsia ba profesór sira ensinu sekundáriu nian no lider eskolár sira.

Hodi fó hanoin fila-fali katak, MCC hanesan ajénsia kooperasaun independente ida, ne’ebé hili Timor-Leste iha fulan-dezembru tinan 2017, ne’ebé prenxe rekizitu sira hodi implementa programa ida ba promosaun kreximentu ekonómiku nian, ne’ebé la’o hamutuk ho prioridade dezenvolvimentu nasionál nian sira.

Iha fulan-jullu tinan 2018, Ministru Fidelis Magalhães, asina Akordu Finansiamentu Inisiál nian ida ho Vise-Prezidente Adjuntu Millennium Challenge Corporation (MCC), Jonathan Brooks, hodi kria ekipa ida ne’ebé integra ona iha programa Millennium Challenge Compact, ne’ebé responsavel ba identifikasaun setór ekonómiku nian sira ne’ebé atu dezenvolve durante implementasaun ba programa ne’e.

Ekipa ida-ne’e ofisiálmente kria iha fulan-marsu tinan 2019 no husi ne’ebá serbisu hamutuk ona ho pontu fokál sira hosi liña ministeriál relevante sira no ho delegasaun sira MCC nian iha definisaun área prioritária sira ba programa ne’e.

   Ba leten