……………………………………………………………………………………………………………
Dili, loron 4, fulan-janeiru, tinan 2022
Komunikadu Imprensa
Governu Timor-Leste hato’o ninia kondolénsia ba Deputadu Silvino Adolfo Morais nia mate
Ho laran triste no sentimentu ne’ebé kle’an, Governu Timor-Leste hatene Deputadu Parlamentu Nasionál, Silvino Adolfo Morais ho idade 65, ne´ebé mate iha loron 3 fulan-janeiru tinan 2022, iha Hospital Guido Valadares, iha Dili.
Deputadu Silvino Adolfo Morais moris iha loron 19 fulan-jullu tinan 1956, iha Atabae, munisípiu Bobonaru nian.
Iha tinan 1974 nia tama iha União Nacional dos Estudantes Timorenses (UNETIM), hodi partisipa direta iha luta hasoru kolonializmu, no ho invazaun Indonézia nian mai Timor-Leste iha tinan 1975, nia halai ba ai-laran nu’udar membru FALINTIL nian, no hodi destaka nia iha rejiaun norte no súl hanesan responsavel hodi transporta munisaun sira.
Iha tinan 1977 nia asume kargu nu’udar komandante seksaun ba Kompañia Intervensaun nú. 4, iha Kailaku. Liu tiha tinan rua, militár indonéziu nian kaer nia.
Husi inísiu dékada 80 to’o 1999, hanesan funsionáriu públiku ba servisu eletrisidade nian iha Bobonaru.
Hafoin referendu iha loron 30 fulan-agostu tinan 1999, asume kargu polítiku oioin iha partidu FRETILIN nian, nu´udar vise-koordenadór daruak Komisaun Polítika Distritál FRETILIN nian iha Bobonaro, hosi tinan 2000 to’o tinan 2006, nu’udar koordenadór interinu hosi tinan 2005 to’o tinan 2010, no nu’udar koordenadór distritál FRETILIN nian iha Bobonaru, hosi tinan 2010 to’o tinan 2016 no, hafoin eleitu fila-fali hosi tinan 2016 to’o tinan 2021.
Deputadu Silvino Adolfo Morais hanesan membru Konsellu Konsultivu Munisipál Bobonaru no membru Komité Sentrál FRETILIN nian, no reprezenta munisípiu Bobonaru hosikedas tinan 2016 to’o ohin loron.
Iha tinan 2017 eleitu nu’udar deputadu Parlamentu Nasionál no iha tinan 2018 eleitu fila-fali no sai membru Komisaun C Parlamentu Nasionál nian.
Portavós Governu nian, Ministru Prezidénsia Konsellu Ministrus, Fidelis Manuel Leite Magalhães, lori Konsellu Ministrus no Governu hotu nia naran, hato’o ninia sentidu kondolénsia ne’ebé kle’an ba família no belun sira deputadu Silvino Adolfo Morais nian, ba Parlamentu Nasionál no ba Partidu FRETILIN. REMATA