Orsamentu Jerál Estadu tinan 2022 nian aprova ona iha Parlamentu Nasionál
Iha loron 16 fulan-dezembru tinan 2021, Orsamentu Jerál Estadu ba tinan 2022, ho montante totál dolar amerikanu billaun 1,95, aprova ona iha Parlamentu Nasionál ho votu afavór 44, votu kontra 21 no abstensaun zero.
Governu Konstitusionál VIII define ona prioridade nasionál neen (6) ba OJE 2022: 1) dezenvolvimentu kapitál umanu (edukasaun, formasaun profisionál no saúde); 2) abitasaun no inkluzaun sosiál; 3) setór produtivu sira (agrikultura no turizmu), ambiente no konektividade; 4) dezenvolvimentu ba setór privadu; 5) dezenvolvimentu rurál; no 6) governasaun di’ak.
Husi medida oi-oin ne’ebé inklui iha orsamentu tinan oin nian, sei fó destake subsídiu ai-han ba funsionáriu públiku sira, Fundu Resposta Emerjénsia nian hodi hatán ba dezastre naturál sira, Fundu ba Investimentu hodi harii Munisípiu foun Ataúro nian, Programa Bolsa da Mãe – jerasaun foun, hala’o Eleisaun Prezidensiál tinan 2022 nian, Dezenvolvimentu ba Empreza Ki’ik no Empreza Média sira, akizisaun veíkulu no ekipamentu ba Bombeirus, hodi hatán ba dezastre naturál sira.
