Lansamentu kampaña vasina Pfizer ba estudante sira ho idade 12 to'o 17
Ministra Saúde Odete Maria Freitas Belo hamutuk ho Ministru Edukasaun Juventude no Desportu, Armindo, Enkaregadu Negósiu Embaixada Estadus Unidus Amerika iha Timor-Leste Tom Daley, Reprezentante OMS Interinu, Dongbao Yu nomós Reprezentante Unicef Sr. Bilal Aurang Zen Durrani ofisiálmente lansa vasina Pfizer Covid-19.
Lansamentu kampaña vasina Pfizer ba estudante sira ho idade 12 to'o 17 ne'e hala'o iha Eskola Ensino Basico Central 3° Ciclo 30 de Agusto, Díli.
Ministra Saúde dr. Odete hatete vasina Pfizer Governu prepara ba joven sira ne'ebé ho idade 12 to'o 17 tanba vasina AstraZeneca no Sinovac ne'e fó de'it ba ema ho idade 18 ba leten nomós vasina Pfizer ne'e doze dahuluk hotu sei hein loron 21 atu simu kompletu bá doze daruak nian.
"Finalmente ita hamutuk iha fatin ida-ne'e hodi hahú kampaña Imunizasaun kontra Covid-19 ba labarik sira ho idade 12 to'o 17 ou menus husi 18 tanba ba ita sira ne'ebé kompleta tinan 18, ita iha vasina Sinovac nomós vasina AstraZeneca, espesiálmente ba idade menus husi 18 ita prepara hela vasina Pfizer ba alin sira ne'e, labarik sira sei simu doze rua. Hafoin simu doze dahuluk sei hein loron 21 sei simu fila-fali doze daruak. Vasina ne'e sei fó ho (0.3 ML) kada doze la hanesan ho vasina AstraZeneca ho vasina Sinovac maibé fatin ne'ebé mak sona hanesan katak iha ita-nia kabas."
Ministra apela ba alunu ho aluna nomós manorin nain sira atu suporta kampaña vasinasaun atu simu vasina Pfizer hodi luta hasoru Covid-19. 
"Hodi Ministériu Saúde nia naran hato'o no apelu ba alunus no professores sira hotu inklui mós ba família ga inan aman sira ne'ebé ho oan idade 12 ate 17 anos atu suporta kampaña vasinasaun ne'ebé mak ita hala'o ohin, importante ida-ne'e atu hamenus risku infesaun iha ita-nia rai doben Timor-Leste."
Ministra informa mós ba estudante sira iha Munisípiu 11 no Rejiaun Administrativa Espesiál Oe-Cusse Ambeno ne'ebé seidauk bele simu vasina Pfizer tanba provizóriu sei fó uluk ba estudante sira iha Kapitál Díli.
"Ba alin sira no familia sira ne'ebé mak mai husi Munisípiu ha'u hakarak husu ha'u nia deskulpa ba ita-boot sira katak vasina ida-ne'e seidauk bá to'o iha Munisípiu maibé iha tempu badak, ha'u espera katak iha fulan novembru ga dezembru ita bele lori tan vasina ne'e ba ita-nia alin sira iha Munisípiu. Provizoriamente ita uza vasina ida-ne'e ou ita admistra vasina ida-ne'e iha de'it eskola sira ne'ebé mak iha Díli laran."
