Governu no Organizasaun Internasionál ba Migrasaun koalia kona-ba kooperasaun hodi reforsa prevensaun no luta hasoru tráfiku de pessoas
Ministru Prezidénsia Konsellu Ministrus, Fidelis Manuel Leite Magalhães, ohin akompaña Primeiru-Ministru no Ministru Interior, Taur Matan Ruak, iha sorumutuk ho parseiru sira hodi halibur esforsu sira-hotu ne’ebé presiza hodi kumpre Governu ninia kompromissu atu prevene no kombate tráfiku umanu.
Sorumutuk ida-ne’e ho objetivu atu tuur hamutuk hodi fahe hanoin atu hetan asaun konkreta ne’ebé diak liu atu bele tau hamutuk esforsu Estadu Timor-Leste nian ho parseiru sira iha prevensaun no luta hasoru tráfiku umanu.
Sorumutuk hetan mós partisipasaun husi Vise-Ministru-Interior, António Armindo, Koordenadór-Rezidente Organizasaun Nasoins Unidas (ONU) nian iha Timor-Leste, Roy Trivedy, Xefe Misaun Organizasaun Internasionál ba Migrasaun sira (OIM) Ihma Shareef, Embaixadór Austrália nian iha Timor-Leste, Peter Roberts no ekipa husi programa Austrália nian ba dezenvolvimentu Polisia Timor-Leste nian (Timor-Leste Police Development Program -TLPDP).
Ministériu Interior hamutuk ho OIM prepara ona nota konsetual ida ba fulan lima oin-mai ba fortalesimentu fronteira Timor-Leste nian no hametin kapasidade ba aplikasaun lei hodi kombate tráfiku umanu no fó protesaun ba vitima husi tráfiku.
Iha fulan-dezembru, ho apoiu Governu Austrália nian, sei halo mós lansamentu ba Sentru Integradu ba Jestaun Informasaun ba Kombate Krime Organizadu hodi kombate krime transnasionál, inklui tráfiku umanu.
