CROP remata análize ba OJE tinan 2022 no aprova tetu orsamentál ho montante billaun US$ 1,675
Komité Revizaun Polítiku (koñesidu liu ho akrónimu CROP), ne’ebé lidera husi Primeiru-Ministru, Taur Matan Ruak, ohin, loron 16 fulan-setembru tinan 2021, iha auditóriu Ministériu Finansas, remata ona análize ba submisaun orsamentál sira no aprova ona tetu orsamentál foun ida ba Orsamentu Jerál Estadu (OJE) tinan 2022 nian, ho valór dolar amerikanu billaun US$ 1,675.
Hafoin análize ba proposta setoriál sira no atu kobre nesesidade programátika no atividade relevante hotu husi ministériu no instituisaun sira Estadu nian ba tinan 2022, presiza atu halo reajustamentu no aumentu tetu orsamentál nian, ne’ebé molok aprova husi Konsellu Ministrus, iha loron 14 fulan-jullu.
Governu Konstitusionál VIII defini ona prioridade nasionál neen ba OJE tinan 2022: 1) Dezenvolvimentu kapitál umanu (edukasaun, formasaun profisionál no saúde); 2) Abitasaun no inkluzaun sosiál; 3) Setór produtivu sira (agrikultura no turizmu), ambiente no konektividade; 4) Dezenvolvimentu setór privadu; 5) Dezenvolvimentu rurál ; no 6) Governasaun di’ak.
Ministériu Finansas sei prepara agora redasaun finál husi Proposta Lei OJE tinan 2022 nian, atu hetan apresiasaun husi Konsellu Ministrus iha sorumutuk oinmai no atu entrega ba Parlamentu Nasionál iha fulan-outubru.
Aleinde Primeiru-Ministru, CROP kompostu husi Vise-Primeiru-Ministru sira, Ministru Prezidénsia Konsellu Ministrus, Ministru Koordenadór Asuntus Ekonómikus, Ministru Finansas, Ministru Edukasaun, Juventude no Desportu, Ministru Transportes no Komunikasoins no Ministru Administrasaun Estatál. Partisipa mós iha sorumutuk CROP ne’e, nu’udar observadór sira, Sekretária Estadu Igualdade no Inkluzaun, Sekretáriu Estadu Juventude no Desportu, no Komisária Direitus Labarik nian.
