MAPKOMS Lansa Programa "Naroman ba Suku" iha Suku Mulo

Ter. 07 setembru 2021, 15:52h
241345070_1283575758740599_9165804512980623947_n

Ministru ba Asuntus Parlamentares no Komunikasaun Sosiál, Francisco Martins da Costa Pereira Jerónimo, tersa-feira ne’e, 7 setembru, lansa ofisialmente programa Governu iha Povu nia Leet "NAROMAN BA SUKU" iha suku Mulo, no mós halo diálogu komunitáriu ho komunidade iha salaun kapela Mulo, Postu Administrativu Hatu-Builico, Munisípiu Ainaro.

Objetivu husi eventu ida ne’e mak atu sensibiliza kona ba programa governu nian ne'ebé mak sei implementa iha suku ne'e hodi identifika no promove potensialidade suku nian.

Iha diskursu ezekutivu MAPKOMS nian hato’o katak, programa Governu Iha Povu Nia Leeet, mai atu haree poténsia iha suku ne'e, hodi fó sai ba públiku liu husi meius komunikasaun sosiál sira. No sei estabelese sentru informasaun suku husi ministériu ida ne’e ba juventude sira atu dezenvolve atividade sira hanesan Citizen Journalism ka Jornalizmu Sidadaun, kapasita sira liu husi formasaun hodi bele fó sai ba mundu, poténsia sira iha suku ne'e rasik.

Lider másimu MAPKOMS ne'e mós haktuir katak, NAROMAN BA SUKU hanesan programa VIII Governu Konstitusionál nian ne'ebé atu bele hakbesik governu mai iha komunidade sira hodi promove no rona preokupasaun komunidade nian iha baze.

Programa ne'e rasik iha nia objetivu prinsipál haat hanesan; 1. Promove asesu ba informasaun iha suku rurais no hakbi'it komunidade sira nia kapasidade ba asesu informasaun; 2. Informa ba komunidade kona-ba programa VIII Governu no rona preokupasaun kona-ba dezenvolvimentu no tranzmite ba ministériu relevante; 3. Hasa'e komunidade nia koñesimentu kona-ba dalan no prosesu ba dezenvolvimentu, inklui iha nível suku no prosesu implementasaun planu dezenvolvimentu no dalan ba povu nia partisipasaun no kontrolu; no 4. Hasa'e povu nia partisipasaun ativa iha prosesu dezenvolvimentu tomak no goza di'ak dezenvolvimentu nia benefísiu sira.

Iha atividade diálogu ne'e, reprezentante juventude sira suku Mulo, husu ba ministériu atu bele buka meius oinsá atu promove poténsia turístika ne’ebé iha. Nune’e mós reprezentante inan-aman husu atu tranzmite ba ministériu relevante hodi bele instala eletrisidade ba aldeia balun ne'ebé seidauk hetan asesu.

Hatan ba preokupasaun hirak ne'e, Ministru MAPKOMS responde katak, ministériu sei fó formasaun ba juventude sira hodi utiliza ekipamentu ne'ebé sei oferese iha Sentru Informasaun ne'e no mós rejista preokupasaun seluk hodi tranzmite ba ministériu relevante ne'ebé trata ba asuntu ne'e.
Iha oportunidade ne'e, membru governu ne'ebé hanesan mós responsável ba iha ekipa interministeriál ba kampaña vasinasaun, aproveita hodi sensibiliza kona-ba esforsu governu nian hodi kombate propagasaun moras Covid-19 no enkoraja komunidade sira atu bele simu vasina kontra moras ne'e.

Partisipa iha diálogu ne'e, Xefe Gabinete SEKOOP ne’ebé reprezenta Sekretáriu Estadu Kooperativa, Administradór Munisípiu Ainaro, Administradór Postu Administrativu Hatu-Builico, autoridade komunitária, veteranu no komunidade sira.

   Ba leten