KROP hahú halo análize ba OJE tinan 2022
Governu, liuhusi Komité Revizaun Polítiku (koñesidu ho akrónimu CROP) hahú iha loron 2 fulan-setembru tinan 2021, halo análize ba programa no proposta orsamentál husi ministériu no ajénsia autónoma sira, ho objetivu atu elabora versaun ikus husi projetu Proposta Lei Orsamentu Jerál Estadu (OJE) tinan 2022, hodi entrega ba Parlamentu Nasionál to’o loron 1 fulan-outubru.
CROP mak iha kompeténsia atu verifika alokasaun estratéjika kona-ba rekursus submisaun orsamentál nian, hodi atinje kompromisu no objetivu sira ne’ebé iha ona dokumentu estratéjiku no analiza kapasidade ezekusaun planu ba tinan finanseiru 2022 nian.
Iha loron dahuluk, sesaun sira ne’ebé prezide husi Vise-Primeiru-Ministru, José Maria dos Reis, no konta mós ho partisipasaun husi Ministru Prezidénsia Konsellu Ministrus, Ministru Koordenadór Assuntus Ekonómikus, Ministru Finansas, Ministru Administrasaun Estatál, Ministru Edukasaun, Juventude no Desportu, Ministru Transportes no Komunikasaun no Vise-Ministra Finansas, Sara Lobo Brites.
Durante loron ne’e, CROP analiza ona programa no proposta orsamentál sira husi Prezidénsia Konsellu Ministrus, Imprensa Nasionál Timor-Leste, Sekretaria Estadu Kooperativa, Sekretaria Estadu Formasaun Profisionál no Empregu no Ministériu Asuntus Kombatentes Libertasaun Nasionál nian.
Sorumutuk sira ho ministériu no ajénsia autónoma sira sei kontinua to’o loron 13 fulan-setembru. Iha loron 14 hahú halo ajustamentu bazeia ba desizaun CROP nian no rezultadu ikus sei aprezenta iha loron 16 fulan-setembru.
Tetu agregadu ho valór dolar amerikanu millaun 1.571,6, ba OJE tinan 2022, aprova ona iha sorumutuk Konsellu Ministrus loron 14 fulan-jullu tinan 2021 nian, bazeia ba análiza ne’ebé CROP halo, sei bele sofre ajustamentu hodi kobre nesesidade hotu husi programa no atividade relevante sira ministériu no insitituisaun Estadu nian ba tinan 2022. Versaun ikus husi projetu Proposta Lei OGE tinan 2022 sei sujeita ba aprovasaun husi Konsellu Ministrus, hodi bele entrega ba Parlamentu Nasionál to’o loron 1 fulan-outubru.
Governu Konstitusionál VIII define ona prioridade nasionál 6 ba OJE tinan 2022: 1) dezenvolvimentu kapitál umanu (edukasaun, formasaun profissionál no saúde); 2) abitasaun no inkluzaun sosiál; 3) setór produtivu sira (agrikultura no turizmu), ambiente no konektividade; 4) dezenvolvimentu setór privadu; 5) dezenvolvimentu rurál; no 6) governasaun di’ak.
