Votu Pezar ba Carmel Budiardjo nia mate

Prezidénsia Konsellu Ministrus

VIII Governu Konstitusionál

...........................................................................................................................

Loron 14, Fulan-Jullu, Tinan 2021

Komunikadu Imprensa

Votu Pezar ba Carmel Budiardjo nia mate

Konsellu Ministrus, iha sorumutuk loron 14 fulan-jullu tinan 2021 nian, aprova ona votu pezar ba Carmel Budiardjo nia mate, ativista direitus umanus no defensora ba autodeterminasaun povu Timor-Leste nian, iha loron 10 fulan-jullu liu ba.

Governu Timor-Leste, lori povu Timoroan tomak nia naran hato’o laran triste tebetebes ba Carmel Budiardjo ninia mate, ativista direitus umanus no defensora ba timoroan sira-nia ukun-rasik an.

Carmel Budiardjo, moris iha Grã-Bretaña iha tinan 1925 nia harii TAPOL, organizasaun ida-ne’ebé defende direitus umanus nian hodi luta ba libertasaun prezu polítiku sira, iha Indonézia, durante rejime Soeharto nian no ne’ebé mak fundamentál tebetebes hodi hetan informasaun sira kona-ba atividade militár nian no violasaun direitus umanus ne’ebé akontese iha Timor-Leste.

Ninia serbisu ne’ebé la sente kole ba direitus umanus, halo nia hetan prémiu Right Livelihood iha tinan 1995 no iha loron 30 fulan-agostu tinan 2009 nia simu Símbolu Orden Timor-Leste nian, ba rekoñesimentu iha ninia kontribuisaun ba luta libertasaun nasionál.

Konsellu Ministrus, lori Governu no Povu Timor-Leste nia naran, aprezenta kondolénsias ba família no belun sira Carmel Budiardjo nian no garante katak ativista ne’e “ Timor-Leste sei la haluha no sei hanoin nafatin ho domin boot, admirasaun no respeitu ba ninia kompromisu ho direitus umanus, justisa no solidariedade”. REMATA

   Ba leten