Sorumutuk Konsellu Ministrus nian iha loron 9 fulan-juñu tinan 2021

Prezidénsia Konsellu Ministrus

VIII Governu Konstitusionál

...........................................................................................................................

Komunikadu Imprensa

Sorumutuk Konsellu Ministrus nian iha loron 9 fulan-juñu tinan 2021

Konsellu Ministrus hala’o sorumutuk iha Auditóriu Ministériu Finansas nian, iha Dili, no hafoin halo análize ba aprezentasaun kona-ba pontu situasaun epidemiolójika país nian, husi koordenadór sira husi Sala Situasaun Sentru Integradu Jestaun Krize nian (SIJK),  aprova ona projetu Rezolusaun Governu nian ne’ebé mantein impozisaun serka sanitária iha Munisípiu Baukau ba loron hitu tan. Konsellu Ministrus deside la renova impozisaun serka sanitária iha Munisípiu Vikeke. Kontinua vigora mós mak impozisaun serka sanitária iha Munisípiu sira hanesan Bobonaru, Dili no kovalima.

Nune’e, bandu nafatin sirkulasaun ema sira nian entre munisípiu Baukau no sirkunskrisaun administrativa sira-seluk, exetu iha kazu hirak ne’ebé ninia fundamentu forte tanba razaun seguransa públika, saúde públika, asisténsia umanitária, manutensaun sistema abastesimentu públiku, ka razaun seluk ne’ebé presiza atu hala’o ba interese públiku nian.

Vise-Primeira-Ministra no Ministra Solidariedade Sosiál no Inkluzaun, Armanda Berta dos Santos, no membru sira husi Komisaun Interministeriál ba Elaborasaun no Koordenasaun kona-ba Ezekusaun Planu Vasinasaun kontra COVID-19 aprezenta ba Konsellu Ministrus pontu situasaun kona-ba ezekusaun planu vasinasaun kontra COVID-19.

To’o loron 8 fulan-juñsu, ema hamutuk 93.525 iha país laran tomak maka simu ona doze dahuluk husi vasina kontra COVID-19, ne’ebé reprezenta 12% husi populasaun ho idade tinan 18 ba leten. Iha Dili, Munisípiu ne’ebé afetadu liu ho surtu COVID-19, doze dahuluk fó ona ba ema hamutuk 80.948, ne’ebé reprezenta 40% husi populasaun ho tinan 18 ba leten iha munisípiu ne’e.

Iha faze dahuluk, entre loron 7 no 28 fulan-abríl, distribui ona vasina ba ema hamutuk 28.412. Iha  faze daruak, entre loron 10 no 28 fulan-maiu, totál ema hamutuk 48.170 maka simu ona doze dahuluk vasina nian. Hahú kedas husi loron 31 fulan-maiu to’o loron 8 fulan-juñu, fó ona doze 16.943. Entre loron 10 fulan-maiu no loron 5 fulan-juñu, iha media, ema rihun tolu maka simu vasina loroloron.

Tuir planu vasinasaun nian, iha Munisípiu Dili sei kontinua fó doze dahuluk ba populasaun ne’ebé seidauk simu, ho vasina Sinovac no vasina AstraZeneca. Ho vasina ne’ebé mai tan liuhusi mekanizmu COVAX nian, sei hahú distribui vasina AstraZeneca ba faze daruak iha país laran tomak, ba populasaun ne’ebé simu ona vasina iha faze dahuluk. Sei kontinua distribui mós vasina doze dahuluk iha munisípiu sira-seluk, no sei fó liu prioridade ba sidadaun sira ho idade 60 ba leten ka ho komorbidade (ne’ebé iha nanis ona moras seluk).

Konsellu Ministrus hato’o agradesimentu ba apoiu sira hotu ne’ebé simu husi nasaun belun sira no husi parseiru dezenvolvimentu nian sira iha akizisaun vasina nian.

Governu deside mós katak sei prepara posibilidade atu sosa vasina ba sidadaun sira ho idade 18 mai kraik no mós preve posivel nesesidade atu adkire vasina ba reforsu imunidade ba tinan 2022.

Primeiru-Ministru apela ba membru sira husi Komisaun Interministeriál ba Elaborasaun no Koordenasaun kona-ba Ezekusaun Planu Vasinasaun kontra COVID-19 atu intensifika implementasaun vasinasaun nian atu hasa’e média loroloron nian husi vasina ne’ebé fó.

Ikusliu, Governu apela ba populasaun sira hotu atu partisipa iha kampaña imunizasaun, fatór ne’ebé sei determina ita atu bele ba fali normalidade. REMATA

   Ba leten