Vasina Sinovac doze rihun 100 to’o ohin

Sab. 05 juñu 2021, 16:50h
194425079_1459459871077373_452086039679686582_n

Timor-Leste, ohin, loron 5 fulan-juñu tinan 2021, simu ona vasina Sinovac rihun 100 no saringa 100.800 ne’ebé oferese husi Repúblika Populár Xina.

Iha serimónia entrega nian, ne’ebé hala’o iha Aeroportu Prezidente Nicolau Lobato, Vise-Primeira-Ministra, Armanda Berta dos Santos, ne’ebé akompaña husi Ministra Negósius Estranjeirus no Kooperasaun, Adalzija Albertina Xavier Reis Magno, no husi Ministra Saúde, Odete Maria Freitas Belo, formalmente simu ona vasina no suprimentu sira husi Embaixadór Xina nian iha Timor-Leste, Xiao Jianguo.

Vasina Sinovac sira-ne’e to’o mai, hafoin pedidu husi Primeiru-Ministru, Taur Matan Ruak, ba ninia omólogu Xinés, Li Keqiang, iha fulan-marsu tinan ida ne’e, atu apoiu haruka vasina mai Timor-Leste.

Vise-Primeira-Ministra agradese, “lori Governu nian naran, ba apoiu husi povu no Governu Xina nian”. Nia hato’o mós agradesimentu ba “Embaixadór Xiao Jianguo, ba esforsu hotu ne’ebé nian hala’o ona atu nune’e vasina ne’e to mai”, ne’ebé “hatudu dala ida tan lasu amizade nian ne’ebé forte tebes entre nasaun rua ne’e.

Embaixadór Xina nian, iha ninia intervensaun fó hanoin katak “to’o oras ne’e, Xina fó ona pakote suprimentu médiku nian hamutuk 12 ba Timor-Leste no pakote medíku nian seluk daudaun ne’e prepara hela, no la kleur tan sei to’o iha Dili.

Diplomata ne’e hateten katak “to’o fulan-maiu ne’e nia rohan, vasina Sinovac doze millaun 600 resin maka fahe ona iha Xina no estranjeiru, iha nasaun sira hanesan Brazíl, Indonézia, Pakistaun, Ungária, Méksiko, Tailándia no Turkia.

Nia hateten mós katak, “Sinovac hetan ona aprovasaun husi Organizasaun Mundiál Saudé nian”, ne’ebé signifika katak vasina ida-ne’e “kumpre padraun internasionál seguransa, efikásia no fábriku nian,

Partisiapa mós iha serimónia ne’e maka reprezentante sira husi UNICEF, Programa Ai-han Mundiál, no Organizasaun Mundiál Saúde nian iha Timor-Leste.

   Ba leten