Primeiru-Ministru konvoka reuniaun ho Konsellu Seguransa no Sala Situasaun
Primeiru-Ministru, Taur Matan Ruak, segunda-feira, loron 03 fulan-maiu 2021, iha rezidénsia ofisiál PM Farol, konvoka reuniaun ho Konsellu Seguransa (F-FDTL - PNTL) nomos Sala Situasaun. Objetivu hosi reuniaun ne’e koalia kona-ba evolusaun situasaun COVID iha ita-nia rai laran, prosesu vasina ne’ebé lao dadauk no impozisaun serka sanitária nian nomos konfinamentu domisiliáriu jerál iha kapitál Dili no servisu hamutuk F-FDTL no PNTL hodi asegura territóriu nasionál, durante luta hasoru Surto Covid-19.
Projetu Rezolusaun Governu nian ba renovasaun husi impozisaun serka sanitária nian hetan ona aprovasaun ba iha Munisípiu Ainaru, Baukau, Dili, Ermera, Kovalima no Vikeke, ba loron 14 tan, to’o tuku 23:59, loron 16 fulan-maiu tinan 2021. Aprova ona mós projetu Rezolusaun Governu nian sira ba impozisaun serka sanitária iha Munisípiu Lautein, Likisá, Manufahi, husi tuku 00:00 loron 30 fulan-abríl tinan 2021 to’o tuku 23:59 loron 16 fulan-maiu tinan 2021. Nune’e, bandu sirkulasaun ema sira nian entre munisípiu sira ne’e ho sirkunskrisaun administrativa sira-seluk, exetu iha kazu hirak ne’ebé ninia fundamentu forte tanba razaun seguransa públika, saúde públika, asisténsia umanitária, manutensaun husi sistema sira abastesimentu públiku, ka razaun seluk ne’ebé presiza atu hala’o ba interese públiku nian.
Konsellu Ministrus aprova ona, ho alterasaun, projetu Rezolusaun Governu nian ba impozisaun konfinamentu domisiliáriu jerál ba ema hotu-hotu ne’ebé mak hela ka oras ne’e daudaun iha hela Munisípiu Dili, ne’ebé tenke hela iha sira nia uma ka iha sira nia alojamentu temporáriu, tuku 00:00 loron 30 fulan-abríl tinan 2021 no tuku 23:59 loron 13 fulan-maiu tinan 2021
Partisipa iha inkontru ne’e, Ministru Defeza, Filomeno da Paixão de Jesus, Vise-Ministru Interiór, Antonio Armindo, Tenente Jenerál Lere Anan Timur, Komandante Jerál PNTL, Komisáriu Polísia, Faustino da Costa, Segundu Komandante Jerál PNTL, Komisáriu Polísia, Mateus Fernandes, Diretur Sentru Integradu Jestaun Krize, Brigadeiru Jenerál, João Miranda “Aluk Descartes”, Komodoro, Donaciano Costa Gomes Pedro “Klamar Fuik”, Komandante PNTL Munisípiu Dili, Superintendente Xefi Polísia, Henrique da Costa no Komandante Komandu Operasaun PNTL, Superintendente Xefi Polísia, Pedro Belo.
