Diskusaun Meza Kabuar virtuál entre Ministra Negósiu Estranjeiru sira kona-ba impaktu husi pandemia COVID-19 ba Feto no Labarik-Feto sira
Loron 28 fulan-abríl tinan 2021- Ministra Negósius Estranjeirus no Kooperasaun Repúblika Demokrátika Timor-Leste nian, S.E. Dra. Adaljiza Magno, partisipa iha diskusaun meza kabuar virtuál ida entre Ministra Negósiu Estranjeiru sira kona-ba impaktu husi pandemia COVID-19 ba Feto no Labarik-feto ho tema “Foku ida ba tráfiku umanu”.
Pandemia COVID-19 ameasa koloka iha risku progresu ne’ebé hetan ho susar iha matéria igualdade jéneru, liuhusi, entre buat seluk: fosu moris-ki’ak nian ne’ebé luan liután entre mane no feto sira, aumentu kazu violénsia bazeia ba jéneru no aumentu husi risku tráfiku umanu iha mundu tomak, ne’ebé inklui feto no labarik-feto sira.
Haree ba importánsia husi perspetiva feto nian iha lideransa kona-ba kestaun polítika kompleksa sira, Sorumutuk Ministra Negósiu Estranjeiru sira nian ida-ne’e organiza atubele sai hanesan plataforma ida hodi diskute konsekuénsia sira husi pandemia COVID-19 ba feto no labarik-feto-sira.
Ministra Magno destaka, iha ninia intervensaun, dezafiu hirak ne’ebé maihusi teknolojia, ne’ebé feto no labarik-feto sira hasoru, liuliu iha kontestu tráfiku umanu, iha ne’ebé perpetradór tráfiku umanu sira adapta an daudaun ho normál foun hodi muda sira nia atividade ba fali meiu online no aumenta tráfiku iha siberespasu, hodi hetan benefísiu husi aumentu envolvimentu online, tanba konfinamentu.
Iha tempu hanesan, Ministra subliña importánsia husi uzu teknolojia nian hanesan meiu inovadór hodi kombate violénsia bazeia ba jéneru no tráfiku umanu liuhusi kampaña online, liña atu tulun no akonsellamentu psikolójiku online, no fornese liña ajuda nian no akonsellamentu jurídiku ba vítima sira husi violénsia bazeia ba jéneru sira nian, inklui vítima tráfiku umanu nian sira.
Sorumutuk virtuál ne’e organiza hamutuk husi Ministra Negósius Estranjeirus no Ministra Feto Austrália nian; Ministra Negósius Estranjeirus, Uniaun Europeia no Kooperasaun España nian. Sorumutuk ne’e konta mós ho partisipasaun husi Vise-Primeira-Ministra no Ministra Negósius Estranjeirus, Asuntus Europeus, Komérsiu Esteriór no Instituisaun Kulturál Federál Béljika nian; Vise-Primeira-Ministra ba Reforma Judisiál no Ministra Negósius Estranjeirus Bulgária nian; Ministra Negósius Estranjeirus no Komunidade Giné-Bisau nian; Ministra Negósius Estranjeirus Andorra nian; Ministra Negósius Estranjeirus Estónia nian; Ministra Negósius Estranjeirus Líbia nian, Ministra Negósius Estranjeirus Sudaun nian; Ministra Negósius Estranjeirus, Edukasaun no Desportu Liechtenstein nian; Sekretária Gabinete Relasaun Esteriór Kénia nian; Vise-Ministra Relasaun Internasionál no Kooperasaun Áfrika Sul nian no Embaixadóra ba Igualdade Jéneru no Koordenadóra Polítika Esterna Feto Suésia nian.
