Governu forma grupu rua atu intervein ba imapktu hosi siklone tropikál Seroja ne’ebé atinje Timor-Leste iha loron 4 fulan abril
Primeiru-Ministru Taur Matan Ruak esplika, nia orienta ona liña ministerial sira hodi forma grupu rua, ida fokus intervein ba estragus infraestrutura sira, no grupu ida seluk sei fokus tau matan ba komunidade afetadu sira hosi impaktu siklone tropikál Seroja ne’ebé mak atinje Timor-Leste iha loron 4 fulan abril liubá, ne’ebé hamosu inundasaun iha kapitál Dili no fatin balun iha teritóriu laran hodi hamosu estragus maka’as iha infraestrutura públiku no privadu inklui hamate ema na’in 27 resin no dezlokadu iha pontu 12 iha kapitál Dili.
Kona-ba infraestrutura sira, sei lidera hosi Vise Primeiru-Ministru, Jose Reis, no Ministru Obras Públika Salvador dos Reis, hodi halo identifikasaun ba estragu sira ne’ebé iha, nune’e bele halo planu oinsá intervein ho emerjénsia atu bele normaliza fila fali liuliu estrada sira ne’ebé kotu atu movimentasaun bele normal hikas fali.
Enkuantu ba área sosiál, sei lidera hosi Ministru Administrasaun Estatal, Miguel Pereira de Carvalho no Sekretáriu Estadu ba Protesaun Sivíl, Joaquim José Gusmão dos Reis Martins, hodi fó apoiu emerjénsia ba populasaun afetadu sira liuliu hirak ne’ebé lakon sira nia uma ne’ebé daudaun ne’e dezloka iha pontu 12 iha kapitál Dili.
“Daudaun ne’e Governu lidera iha grupu rua, grupu ida mak lidera hosi Ministru Estatal ho protesaun Sivíl hodi tau matan ba família sira ne’ebé afetadu ne’ebé evakua ba fatin 19 iha Dili laran ne’e, halo nusa mak sira bele han hahán manas, hahán malirin, halo nusa mak limpeza fatin sira para sira ne’ebé uma la iha bele hela sementara [provizóriu] sira ne’ebé uma sei di’ak, oinsá mak tau matan ba sira.
Hosi infraestruturas nian, S.E. Vise Primeiru-Ministru no Ministru Obras Públika mak tau matan para ita bele hadi’a/rekupera. Tinan kotuk ataka sorin ne’e, ita konsege halo buat balun, reduz nia risku, mas tinan ida ne’e kuaze Dili laran hotu, fatin ida ne’e [ponte Taibesi] ha’u mai dala rua, tanba ha’u preokupa loos, tanba ponte ida ne’e ladi’ak, tanba ne’e mak Sr. Vise Primeiru-Ministru iha ne’e”, esplika Xefe Governu.
