Embaixador EUA ba Timor-Leste Halo Vizita ba Edifisiu CDT-TL
Iha loron 31 Marsu 2021, Embaixador Foun Estadus Unidos America (EUA), S.E. Charles Kevin Blackstone hala’o vizita kortezia ida ba Edifisiu CDT-TL, iha Palacio do Governu-Dili. Vizita Embaixador nian simu direita husi Diretor Ezekutivu Nasíonal CDT-TL, Embaixador Constancio Pinto, Adjuntu Mariano Carmo ho Ekipa. Embaixador Pinto hato’o nia parabens no benvindu ba S.E. Charles Kevin Blackstone, nudar Embaixador foun (EUA) ba Timor-Leste.
Aporveita vizita refere, Embaixador Pinto mós atualiza informasaun kona-ba progresu dezenvolvimentu Compact iha Area Tratamentu Bee, Saneamentu no Drenazen ho Edukasaun. Embaixador Pinto hato’o mos katak tuir lolos Governu EUA ho Governu Timor-Leste asina tiha ona akordu ba implementasaun programa Compact refere iha fulan Outubru 2020 maibé tanba mosu pandemia COVID-19 mak ita la konsege asina. Maske nune CDT-TL ho MCC kontinua hala’o servisu hodi finaliza estudu viabilidade sira. Dadaun ne’e CDT-TL ho MCC halo hela esforsu atu lori hikas espesialista sira MCC mai Timor-Leste hodi finaliza estudu refere. Tuir planu Governu EUA no Governu Timor-Leste sei asina akordu Compact nian iha tinan 2021 nia laran. “Durante hala’o servisu CDT-TL hetan apoiu maximu husi Governu Timor-Leste, Sosiedade sivil, Setor privadu, Parseiru Dezenvovimentu no povu tomak. Dadaun ne’e ema hotu hein bainhira mak projetu ne’e hahu implmenta”, hateten Embaixador Pinto.
Hafoin rona tiha atualizasaun husi Embaixador Pinto, S.E. Embaixador EUA hateten katak nia parte apoiu tebes esforsu CDT-TL no MCC nian. “Ne’e hanesan prioridade ida husi hau nia misaun nudar Embaixador mai Timor-Leste”, hateten S.E. Charles Kevin Blackstone. S.E. Embaixador ne’e mós komprometidu atu serbisu hamutuk ho CDT-TL no MCC hodi realiza investimentu refere.
