Governu Timor-Leste

Instituisaun estadu ne’ebe responsabiliza ba programa Cesta Bázika, liuhusi koordenasaun Ministru Koordenador Asuntus Ekonómikus (MKAE), iha loron 25 Fulan-Fevereiru Tinan 2021, hamosu ona despaixu hodi ekstende programa distribuisaun Cesta Bázika to’o loron 31 Fulan-Marsu tinan 2021.

Despaixu konjuntu ida-ne’e asina husi Ministru Koordenador Asuntus Ekonómikus, Joaquim Amaral, Ministru Turizmu, Komérsiu no Indústria, José Lucas do Carmo da Silva no Ministru Agrikultura no Peskas, Pedro dos Reis.  Seremonia asina despaixu konjuntu ne’e realiza iha Gabinete Ministru Koordenador Asuntus Ekonómikus iha Palásiu Governu.

Despaixu konjuntu nee, akresenta konaba pontus importante hodi konsidera konstranjimentu husi udan ne’ebe defisil  ba fornesedor sira hodi asesu ba kondisaun estrada, liu liu ba suku sira iha area remotas inklui serka sanitária ne’ebe akontese iha teritoriu balun tanba SARS-CoV-2. Maske nune’e, iha periodu fulan hirak liu ba até loron 24 Fulan-Fevereiru populasaun liu atus sia (900 mil) mak hetan tiha ona kabazes no mos voucher husi programa Cesta Bázika nee rasik.

Ho nunee, liuhusi despaixu konjuntu ida-ne’e sei estende to’o loron 31 Fulan-Marsu tinan 2021 distribuisaun ba programa ida-ne’e, ho karateristika universal ne’ebé bele kobre populasaun hotu iha teritoriu bazeia ba Dekretu-Lei nu.u 48/2020, 7  outubru, ne’ebe hetan alterasaun ho Dekretu Lei nu. 1/2021, 6 janeiru kona-ba  programa Cesta Bázika.