……………………………………………………………………………………………………………
Komunikadu Imprensa
Sorumutuk Konsellu Ministrus nian iha loron 24 fulan-fevereiru tinan 2021
Konsellu Ministrus hala’o sorumutuk iha Palásiu Governu, iha Dili no, analiza ona proposta Kriasaun Komisaun Koordenasaun ba Implementasaun Parke Industriál sira (KKIPI) ne’ebé aprezenta husi Ministru Turizmu, Komérsiu no Indústria, José Lucas da Carmo da Silva. Komisaun ne’e iha misaun ba koordenasaun no analiza paresér no estudu multidisiplinár sira ne’ebé presiza ba redasaun projetu atu lejizlativu no polítiku sira ho objetivu ba kriasaun, instalasaun no operasionalizasaun parke industriál sira.
Vise Primeira-Ministra no Ministra Solidariedade Sosiál no Inkluzaun, Armanda Berta dos Santos no Vise-Ministra Solidariedade Sosiál, Signi Chandrawati Verdial, halo aprezentasaun preliminár ida kona-ba proposta ba reforma programa Bolsa da Mãe, liuhusi projetu-pilotu “Preparasaun ba Jerasaun Foun”. Reforma ne’e, katak prevee ona iha Planu Rekuperasaun Ekonómika, sei hahú ho implementasaun faze-pilotu ida, ho durasaun tinan tolu, ho foku iha infánsia dahuluk no ho objetivu atu hamenus ki’ak, má-nutrisaun no mortalidade infantíl. REMATA