……………………………………………………………………………………………………………
Komunikadu Imprensa
Sorumutuk Konsellu Ministrus nian iha loron 19 fulan-fevereiru tinan 2021
Konsellu Ministrus hala’o sorumutuk iha Palásiu Governu, iha Dili, no aprova ona projetu Proposta Lei ba alterasaun daruak kona-ba Lei n.11/2009, loron 7 fulan-outubru, kona-ba Divizaun Administrativa Territóriu nian, ne’ebé propoin husi Ministru Administrasaun Estatál, Miguel Pereira de Carvalho. Liuhusi Proposta Lei ida ne’e, sei submete ba Parlamentu Nasionál, ne’ebé ho objetivu atu kria sirkunskrisaun administrativa foun ida eskalaun dahuluk nian, Munisípiu Ataúru, ne’ebé territóriu, illa Ataúru nian, maka baze ba Postu Administrativu Ataúru, Munisípiu Dili nian, ne’ebé la eziste ona. Objetivu husi Proposta Lei ne’e mós atu kria Postu Administrativu Hatulia B nian, iha Munisípiu Ermera, liuhusi divizaun sirkunskrisaun administrativa nian korrespondente ba Postu Administrativu Hatulia. Iha Munisípiu Lautein, ho alterasaun proposta ne’e, sei kria Postu Administrativu Loré nian, liuhusi divizaun sirkunskrisaun administrativa korrespondente ba Postu Administrativu Lospalos nian.
Governu delibera ona atu propoin ba Sua Exelénsia, Señór Prezidente Repúblika, Francisco Guterres Lú Olo, renovasaun estadu emerjénsia nian, ba loron tolunulu tan. Haree ba mudansa preokupante husi situasaun epidemiolójika no proliferasaun ba kazu sira ne’ebé mak rejista ona husi kontájiu COVID-19 nian, tantu iha nivel rejionál, no mós iha nivel mundiál, no atu evita no neutraliza risku sira husi propagasaun SARS-CoV-2, atu nune’e bele proteje saúde públika no iha kbiit atu hatán ba Sistema Nasionál Saúde nian, Governu propoin ba Señór Prezidente Repúblika katak, ho renovasaun estadu emerjénsia nian ne’e, permite atu suspende ka limita direitu no garantia fundamentál balun.
Ikusliu, Ministru Ensinu Superiór, Siénsia no Kultura, Longuinhos dos Santos, aprezenta opsaun polítiku-Lejizlativa sira ne’ebé sai hanesan baze ba projetu lejizlativu ba kriasaun garantia finanseira nian ba liña Kréditu “Ensinu Superiór Kualidade +” ne’ebé destina ba apoiu finanseiru instituisaun sira Ensinu Superiór Privada ne’ebé iha Akreditasaun. Opsaun sira ne’ebé aprezenta ba kriasaun liña kréditu ida ho taxa jurus ne’ebé ki’ik iha objetivu prinsipál atu permite hadi’a kualidade ensinu superiór nian, tanba ho asesu ba finansiamentu, instituisaun sira ne’e bele hadi’a sira-nia infraestrutura no kapasita sira-nia rekursus umanus. REMATA