Governu Timor-Leste

Ministru Prezidénsia Konsellu Ministrus, Fidelis Manuel Leite Magalhães, hasoru malu ho Diretór Ezekutivu TIK Timór, Roberto Caetano de Sousa Vicente no ho ekipa komisaun téknika eventuál nian ba preparasaun estratéjia integrada ida hodi haree ba implementasaun sistema identifikadór úniku ida (koñesidu mós ho “Unique ID”) sidadaun timoroan sira-nian.

Sistema Identifikadór Úniku Sidadaun sira-nian ne’e halo parte ba Programa Reforma Administrasaun Públika no nu’udár baze importante atu hadi’a prestasaun efetiva, efisiénsia no planeamentu servisu públiku sira-nian no atu asegura jestaun no koordenasaun polítika sosiál ida-ne'ebé di'ak, no iha tempu hanesan permite kontribui ba konstrusaun estruturada governasaun eletrónika nian iha Timor-Leste.

Governu, liuhusi Ministériu Reforma Lejizlativa no Asuntus Parlamentares ne’ebé uluk eziste, foti inisiativa hodi husu estudu preparatóriu sira ba implementasaun sistema identifikadór úniku. Estudu hirak ne’e remata ona iha tinan 2019 nia-rohan no estudu sira ne’e rekere ligasaun ida ne’ebé luan husi ministériu no servisu oin-oin ho objetivu atu dezenvolve sistema identifikadór úniku ho forma armoniozu no teknikamente adekuadu.

Komisaun téknika ne’e harii iha loron 19 fulan-marsu tinan 2020, ho misaun atu konklui estratéjia integrada ida hodi materializa sistema identifikadór úniku ne’e, hamutuk ho planu implementasaun detalladu ida no ninia orsamentu, ne’ebé atu submete ba Konsellu Ministrus. Komisaun Téknika prezide husi Diretór Ezekutivu Institutu Públiku TIK Timór nian no inklui mós iha laran reprezentante sira husi liña ministeriál relevante sira.

Enkontru ne’e serve hodi halo pontu situasaun husi projetu ne’e, avalia rezultadu sira ne’ebé alkansa ona no prepara pasu sira tuirmai atu nune’e bele finaliza estratéjia implementasaun husi “Unique ID”, ne’ebé, iha tempu badak, sei haruka ba Konsellu Ministrus hodi halo apresiasaun.

Iha ámbitu husi preparasaun ida-ne’e nian, halo ona konsulta públiku oin-oin ho organizasaun governamentál no la’ós governamentál sira. Iha loron 18 no 19 fulan-fevereiru oinmai, ekipa téknika sei debate projetu ne’e ho parseiru dezenvolvimentu nian sira no ho sosiedade sivíl.