Asinatura Protokolu Tranferénsia Dotasaun Orsamentál ba RAEOA no Lansamentu Utilizasaun Sistema Integradu Informasaun Jestaun Finanseiru ka GRP Autoridade RAEOA no ZEESM nian
Iha loron 21 fulan-Janeiru tinan 2021, Ministru Finansas, Rui A. Gomes, akompaña husi Vise-Ministra Finansas, Sara Lobo Brites, no Prezidente Autoridade Rejiaun Administrativa Espesiál Oekusi Ambenu (RAEOA-ZEESM), Arsénio P. Bano, hala’o serimónia importante rua iha Auditóriu Kay Rala Xanana Gusmão.
Serimónia dahuluk husi serimónia rua ne’e maka asinatura protokolu entendimentu entre Ministériu Finansas no Autoridade RAEOA kona-ba transferénsia Verba ho montante dolar amerikanu millaun 29.243, ne'ebé alokadu iha Dotasaun Governu Tomak nian hodi finansia despeza Autoridade RAEOA no ZEESM nian ba tinan 2021 ne’ebe Parlamentu Nasionál aprova ona ho montante totál dolar amerikanu millaun 127. Detaille husi fonte finansiamentu nian maka: dotasaun husi Governu Sentrál hamutuk dolar amerikanu millaun 29.243; Saldo husi Jerénsia RAEOA nian, ne’ebé disponivel iha ninia konta rasik, tau hamutuk husi tinan anteriór sira, maka dolar amerikanu millaun 97.757.
Serimónia daruak maka lansamentu Utilizasaun Sistema Integradu Informasaun Jestaun Finanseiru, ne’ebé koñesidu ho naran Goverment Resource Planning - GRP, hosi Autoridade RAEOA.
Lansamentu ne’e hanesan hakat importante ida no maihosi esforsu lubuk idak hosi parte rua. Ho alterasaun ida-ne’e, Autoridade RAEOA hahú ezekuta ninia orsamentu liuhosi sistema ida-ne’ebé Governu Sentrál utiliza hodi bele promove liután transparénsia iha ezekusaun orsamentál iha Administrasaun Públika no hatán duni ba ezijénsia hosi órgaun Fiskalizador sira hanesan Parlamentu Nasionál no Kámara Kontas.
Bainhira utiliza sistema ne’e, Autoridade RAEOA sei iha asesu ba Módulu sira hanesan tuirmai ne’e : Módulu Finansas (finance module), Módulu Aprovizionamentu (procurement module), Módulu Jestaun Kontratu (contract management module), Jestaun Tezouraria - Pagamentu, Kontabilidade, no Relatóriu Finanseiru (Treasury Management), Módulu Orsamentu (Performance Budgeting Module), Módulu ba Rejistu Patrimóniu (Asset Module).
Benefisiu importante seluk ne'ebé Autoridade sei uzufrui maka dadus kona-ba Ezekusaun Orsamentu Autoridade RAEOA bele asesivel liuhusi Portál Transparénsia (Budget Transparency Portal) iha tempu reál.
Nune’e, inísiu utilizasaun Sistema GRP nian husi Autoridade RAEOA nu’udar pasu importante ida iha ámbitu implementasaun Polítika Reforma Jestaun Finansas Públikas, hodi promove transparénsia no responsabilizasaun ba uzu osan públiku.
Iha lansamentu ne’e, Ministru Finansas, Dr. Rui Gomes, rekoñese no hato’o agradesimentu ba Vise-Ministra Finansas, Sara Lobo Brites, “tambá husi Vise-Ministra Finansas nia lideransa maka ohin loron ita bele hala’o Lansamentu utilizasaun sistema GRP hosi Autoridade RAEOA”.
Ministru Finansas agradese mós ba dirijente no ekipa téknika sira husi Gabinete Jestaun Informátika no Finanseira, Diresaun Jerál Servisu Korporativu no Diresaun Jerál Tezouru, ne’ebé mak hala’o serbisu makas no fó formasaun adekuada ba jestór sira iha Oekusi.
