Ministériu Saúde hala'o lansamentu ba parseria ho Organizasaun Mundial Saúde no Uniaun Europeia ba mitigasaun ba impaktu sira husi moras transmissíveis

Seg. 18 janeiru 2021, 17:44h
138700322_1810901695732597_8634280533885039500_o

Governu, liuhusi Ministra Saúde, Odete Maria Freitas Belo, lansa ona, ohin, loron 18 fulan-janeiru tinan 2021, parseria ida ho Uniaun Europeia (UE) no ho Organizasaun Mundiál Saúde nian (OMS), hodi halo mitigasaun husi impaktu moras transmissível nian sira, liuliu ba  COVID-19, nune’e mós, hodi kontribui ba sistema saúde ida ne’ebé forte, efikás no reziliente iha Timor-Leste.

Iha ámbitu parseira ida-ne’e, Uniaun Europeia sei oferese osan besik dolar amerikanu millaun 2,4 ba programa ida-ne’ebé sei implementa durante fulan 20, iha país tomak, ba fortalesimentu sistema saúde nian to’o nivel suku.

Programa ne’e iha objetivu estratéjiku haat, mak hanesan:

  • harii operasaun sira atu hatán ba COVID-19, ne’ebé efikás, sensivel ba jéneru no inkluziva, partisipativa, transparente no responsavel;
  • haforsa kapasidade realizasaun teste sira, detensaun no monitorizasaun husi kazu COVID-19 nian;
  • hamenus risku impaktu sira ne’ebé avansadu kona-ba morbilidade no mortalidade, no inklui kestaun saúde sira seluk; no
  • hetan, iha tempu ne’ebé adekuadu, tékniku espesialista, ekipamentu protesaun individuál no artigu sira seluk ne’ebé la’ós médiku ne’ebé presiza ba prevensaun no mitigasaun COVID-19 nian.

Durante lansamentu parseria ne’e, Ministra Saúde hatete katak “maske númeru kazu sira ladún boot, Timor-Leste kontinua iha risku” no nia afirma katak “ho apoiu husi parseiru sira, hanesan UE no OMS, ita bele harii sistema saúde di’ak no forte liu iha Timor-Leste”.

Andrew Jacobs, Embaixadór UE, esplika katak “inisiativa ne’e sei haforsa kapasidade laboratóriu nasionál hodi hadi’a jestaun husi kazu COVID-19 nian no sei tulun sentru sira programa Saúde iha Família nian liuhusi fornesimentu ekipamentu diagnóstiku foun no ai-moruk sira.”

Arvind Mathur, Reprezentante OMS nian, hato’o ninia haksolok tanba parseria ida ne’e entre OMS ho UE nian no destaka importánsia kontribuisaun UE nian “ba esforsu OMS nian sira iha apoiu ba resposta Timor-Leste nian ba pandemia ida-ne’e”. Nia mós afirma katak “hamutuk, ita tenke kontinua hametin resposta ba COVID-19, hodi implementa medida preventiva bázika sira saúde públika nian ne’ebé forte”.

 

   Ba leten