……………………………………………………………………………………………………………
Komunikadu Imprensa
Sorumutuk Konsellu Ministrus nian iha loron 13 fulan-janeiru tinan 2021
Konsellu Ministrus hala’o sorumutuk iha Palásiu Governu, iha Dili, no, bazeia ba proposta Ministru Ensinu Superiór, Siénsia no Kultura nian, Longuinhos dos Santos, delibera ona hodi nomeia Profesór Doutór João Soares Martins nu’udar Reitór Universidade Nasionál Timor Lorosa’e (UNTL) nian ba tinan lima.
Konsellu Ministrus mós aprova konteúdu husi memorandu entendimentu ne’ebé sei asina husi Ministériu Edukasaun, Juventude no Desportu Timor-Leste nian no Embaixada Repúblika Koreia no Ajénsia Kooperasaun Internasionál Koreia nian (KOIKA) relasiona ho projetu dezenvolvimentu desportu ba labarik sira iha Timor-Leste. Memorandu Entendimentu ne’e aprezenta husi Ministru Edukasaun, Juventude no Desportu, Armindo Maia no husi Sekretáriu Estadu Juventude no Desportu, Abrão Saldanha. Projetu ne’e ho objetivu atu promove partisipasaun labarik sira nian iha atividade desportiva no atu sensibiliza públiku einjerál ba dezenvolvimentu infantíl liuhusi atividade desportiva. Liuhusi programa ne’e, hakarak mós atu estabelese sistema desportivu iha Timor-Leste, liuhusi reforsu kapasidade jestaun organizasionál no treinadór desportivu juveníl sira no liuhusi modernizasaun ba fasilidade desportiva juveníl sira nian.
Konsellu Ministrus, bazeia ba proposta Ministru Asuntus Parlamentares no Komunikasaun Sosiál, Francisco Martins da Costa Pereira Jerónimo, mós delibera atu nomeia Manuel Pinto nu’udar Prezidente Konsellu Diretivu TATOLI nian – Ajénsia Notisioza Timor-Leste, I.P., ba tinan haat.
Ministra Negósius Estranjeirus no Kooperasaun, Adaljiza Albertina Xavier Reis Magno, halo aprezentasaun ida kona-ba prosesu revizaun husi graduasaun Timor-Leste nian atu sai husi kategoria País sira Menus Dezenvolvidu iha Organizasaun Nasaun Unidas. Hafoin analiza vantajen no dezvantajen hodi hatama ba grupu nasaun sira ne’ebé iha dezenvolvimentu, no maske Timor-Leste kualifikadu ona ba estatutu ida ne’e, Konsellu Ministrus deside hodi adia graduasaun Timor-Leste.
Ikusliu, Konsellu Ministrus aprova, ho alterasaun sira, projetu planu lejizlativu Governu nian ba tinan 2021, ne’ebé aprezenta husi Ministru Prezidénsia Konsellu Ministrus, Fidelis Manuel Leite Magalhães. Planu lejizlativu ne’e elabora ona tuir proposta ne’ebé submete husi membru sira Konsellu Ministrus nian. Planu ne’e, nu’udar previzaun ida ba intervensaun lejizlativa Governu nian no sira-nia prioridade sira, ne’ebé fahe tuir setór sira, ba tinan 2021. Planeamentu lejizlativu ne’e hanesan instrumentu ida ne’ebé define ona atu hadi’a kualidade atividade lejizlativa Governu nian. REMATA