……………………………………………………………………………………………………………
Komunikadu Imprensa
Sorumutuk Estraordináriu Konsellu Ministrus nian iha loron 8 fulan-janeiru tinan 2021
Konsellu Ministrus hala’o sorumutuk iha Palásiu Governu, iha Dili, no aprova ona projetu Dekretu Governu nian kona-ba ezekusaun Orsamentu Jerál Estadu (OJE) nian ba tinan 2021, ne’ebé aprezenta husi Ministru Finansas, Rui Augusto Gomes.
Dekretu Governu nian ida-ne’e hatuur regra sira kona-ba Ezekusaun Orsamentu Jerál Estadu nian ba tinan 2021, ne’ebé hetan aprovasaun husi Lei n.14/2020, loron 29 fulan-dezembru no aplika ba orsamentu sira ba órgaun no servisu sira husi Administrasaun Sentrál, Rejiaun Administrativa Espesiál Oekusi Ambenu no Seguransa Sosiál.
Diploma ida-ne’e hakarak fó garantia ba kontrolu orsamentál ne’ebé efetivu no rigorozu no, iha tempu hanesan, simplifika prosedimentu sira ezekusaun orsamentál nian, hodi fó kontinuidade ba mudansa sira ne’ebé hahú ona iha tinan 2020, ho objetivu atu fasilita ezekusaun Orsamentu Jerál Estadu nian ba tinan 2021 husi órgaun no servisu sira husi Setór Públiku Administrativu.
Entre diferensa sira ho Dekretu Governu husi Ezekusaun ba OJE tinan 2020 nian, balu mak, eziste de’it rejime finanseiru rua, implementasaun orsamentasaun tuir programa sira, alterasaun ba data taka ezersísiu orsamentál, fleksibilizasaun husi ezekusaun orsamentál no aumentu obrigasaun sira fahe informasaun nian.
Ikusliu, Ministra Saúde, Odete Maria Freitas Belo, no Diretora-Jerál ba Prestasaun Servisu Saúde, Odete Viegas, halo aprezentasaun ida kona-ba planu introdusaun vasina COVID-19 iha Timor-Leste. Aprezentasaun ne’e konta mós ho intervensaun husi Reprezentante husi Organizasaun Mundiál Saúde (OMS) nian iha Timor-Leste, Rajesh Pandav. Durante aprezentasaun ne’e, esplika ona kona-ba vasina saida de’it mak eziste no vasina saida mak adekuadu liu ba kontestu nasionál, liuliu haree ba nesesidade armazenamentu nian ne’ebé eziste ona iha País ne’e. Aprezenta ona mós prioridade sira ba prazu-badak atu estabelese mekanizmu hirak ne’ebé nesesáriu ba planeamentu no koordenasaun kona-ba implementasaun efikás vasina ne’e nian no ba identifikasaun grupu-alvu hirak ne’ebé sai nu’udar prioridade. Sei kria ekipa téknika interministeriál ida-ne’ebé sei sai nu’udar responsavel ba elaborasaun planu vasinasaun kontra COVID-19 iha Timor-Leste. REMATA