Sorumutuk Estraordináriu Konsellu Ministrus nian iha loron 29 fulan-dezembru tinan 2020

Prezidénsia Konsellu Ministrus

VIII Governu Konstitusionál

...........................................................................................................................

Komunikadu Imprensa

Sorumutuk Estraordináriu Konsellu Ministrus nian iha loron 29 fulan-dezembru tinan 2020

Konsellu Ministrus hala’o sorumutuk iha Palásiu Governu, iha Dili, no aprova ona projetu Dekretu Governu nian, ne’ebé aprezenta husi Primeiru-Ministru iha ezersísiu, José Maria dos Reis, kona-ba alterasaun dahuluk ba Dekretu Governu nian n. 18/2020, loron 3 fulan-dezembru, kona-ba medida sira ba ezekusaun Deklarasaun Estadu Emerjénsia ne’ebé efetua husi Dekretu Prezidente Repúblika nian n. 70/2020, loron 3 fulan-dezembru. Haree ba agravamentu situasaun saúde nian iha provínsia Timor Osidentál, iha Repúblika Indonézia, iha ne’ebé kazu pozitivu COVID-19 to’o ona 1700, haree ba deskobre tipu foun SARS-CoV-2 nian, ne’ebé kontajioza maka’as liu fali duké virus orijinál ne’e no haree ba aumenta númeru kazu sira ne’ebé diagnóstiku iha territóriu nasionál, presiza adota medida foun sira hodi evita surtu COVID-19 nian foun ruma mosu iha país ne’e. Ho alterasaun ida-ne’e, sei define filafali regra sira kona-ba distansiamentu sosiál, tanba ne’e, ema hotu-hotu ne’ebé hela iha Timor-Leste tenke:      

  • Mantein distánsia, pelumenus metru ida, husi ema seluk, ne’ebé maka la hela hamutuk ho nia iha uma ida, bainhira la’o ain iha dalan públiku ka tama iha resintu, públiku ka privadu sira, ne’ebé ninia asesu loke ba públiku no destina ba utilizasaun koletiva;
  • Labele halibur malu liu husi ema na’in sanulu, exetu sira ne’e pertense ba uma kain ida de’it;
  • Labele organiza nein partisipa iha eventu ka selebrasaun sira ne’ebé halibur ema liu husi na’in sanulu, exetu sira pertense ba uma kain ida de’it;
  • Utiliza máskara oin nian ne’ebé taka inus no ibun bainhira la’o iha dalan públiku ka tama ka hela iha resintu públiku ka privadu, ne’ebé ninia asesu loke ba públiku no destina ba utilizasaun koletiva no, bainhira uza kualkér transporte públiku pasajeiru nian;
  • Fase liman bainhira hakarak tama ka hela iha resintu públiku ka privadu sira, ne’ebé ninia asesu loke ba públiku no destina ba utilizasaun koletiva.

Hetan ona mós aprovasaun ba projetu Rezolusaun Governu nian, ne’ebé impoin serka sanitária ida iha Rejiaun Administrativa Espesiál Oekusi Ambenu (RAEOA), haree ba kazu SARS-CoV-2 nian ne’ebé diagnóstika ona foin daudaun ne’e iha Rejiaun ne’e no atu kontrola saúde públika husi populasaun RAEOA nian no impede tranzmisaun lokál SARS-CoV-2 nian iha territóriu nasionál. Ho projetu Rezolusaun Governu nian daudaun ne’e, postu fronteira nian sira iha RAEOA sei taka hotu no bandu dezlokasaun sira, liuhusi rai-maran no tasi, entre rejiaun ne’e ho munisípiu sira seluk, to’o tuku 23:59 loron 2 fulan-janeiru tinan 2021. REMATA

 

   Ba leten