Loron Mundiál Luta Hasoru Korupsaun

Kua. 09 dezembru 2020, 17:03h
IMG_0260

Ministru Prezidénsia Konsellu Ministrus, Fidelis Manuel Leite Magalhães, partisipa iha komemorasaun Loron Internasionál Kontra Korrupsaun, ne’ebé kada tinan selebra iha loron 9 fulan-dezembru, ne’ebé deklara ona husi Organizasaun Nasoins Unidas hafoin Konvensaun Nasoins Unidas nian kontra Korrupsaun, iha tinan 2003. Serimónia ne’ebé organiza husi Komisaun Anti-Korrupsaun (KAK) ne’e hala’o iha salaun Lanine Larigutu, Komisaun Nasionál Eleisoins (CNE, sigla lian portugés) nian.

Programa eventu ne’e nian inklui lansamentu Planu Estratéjiku KAK nian (PEKAK) ba períodu tinan 2021 to’o tinan 2025 no mós inísiu husi diseminasaun Lei n.7/2020, loron 26 fulan agostu, kona-ba Medida sira ba Prevensaun no Kombate hasoru Korrupsaun.

Ministru Prezidénsia Konsellu Ministrus, iha nia intervensaun iha abertura eventu ne’e nian, hatete fila-fali “Governu nia vontade polítika atu halo ninia parte iha kombate ne’e no garante apoiu ne’ebé nesesáriu no kolaborasaun institusionál ba KAK no entidade sira seluk ne’ebé iha responsabilidade iha área ida-ne’e”.

Ministru ne’e rekoñese “intensifikasaun atividade KAK nian iha ninia misaun atu atua hodi prevene no hodi hapara aktu korrupsaun nian iha ninia forma oioin” no saúda “KAK no ninia membru no funsionáriu hotu”, no fó aten-barani ba sira “hodi kontinua empeñamentu hanesan bainhira hala’o sira-nia funsaun, no buka liután efikásia no impaktu loloos husi atividade ne’e.

Na’i Ulun ne’e fó hanoin kona-ba “dimensaun no impaktu negativu boot oin-oin husi flajelu ida-ne’e” ne’ebé signifika “rekursu lubuk boot maka ema hasai husi karteira investimentu públiku sira iha edukasaun, saúde, benefísiu sosiál sira no husi dezenvolvimentu ein jerál”, tanba ne’e “kombate hasoru korrupsaun labele sai hanesan dezafiu ne’ebé fó ba KAK de’it”, maibé devér ida husi “órgaun Estadu nian hotu-hotu nune’e mós atór polítiku sira seluk no sosiedade sivíl, husi setór públiku no privadu”, “atu kombate ida-ne’e bele efetivu liután no, sai nu’udar luta nasaun tomak nian duni”

Fidelis Magalhães konsidera mós katak “iha fulan hirak ikus-ne’e ita, hamutuk, fó pasu boot” ho objetivu atu altera realidade ne’e, ho “aprovasaun foin daudaun ne’e, ho unanimidade, husi Parlamentu Nasionál no publikasaun tuirmai Lei kona-ba Medida sira ba Prevensaun no Kombate hasoru Korrupsaun, ne’ebé inklui kontrolu efetivu ba rendimentu husi ema hirak ne’ebé okupa kargu públiku sira”, “ho adosaun husi Governu ba Programa Reforma Administrativa Públika tinan 2019-2023” “no agora ho elaborasaun Planu Estratéjiku Komisaun Anti-Korrupsaun (PEKAK) tinan 202-2025 agora ne’e no ninia lansamentu”.

Na’i ulun ne’e taka ninia diskursu no dezeja “serbisu di’ak ba hotu-hotu no hein katak iha tinan oin, iha tempu hanesan daudaun ne’e, ita bele ona ko’alia kona-ba rezultadu no asaun barak liután iha prevensaun no kombate hasoru korrupsaun iha ita-nia país!”, tamba “ida-ne’e maka ita-nia sidadaun sira hein! No ba ida-ne’e mak ita hotu tenke kontribui ho asaun institusionál sira no atitude individuál oin-oin”.

   Ba leten