Governu asina akordu subvensaun anuál nian ho Konferénsia Episkopál Timorense

Primeiru-Ministru, Taur Matan Ruak no Dom Norberto do Amaral, Prezidente Konferénsia Episkopál Timorense nian (CET, sigla lian portugés), Bispu Dioseze Maliana, ohin, loron 13 fulan-novembru, asina ona akordu ida ne’ebé define atribuisaun, husi parte Governu nian, ba subvensaun públika ida korrespondente ho valór totál dolar amerikanu millaun lima ba tinan finanseiru 2020 ba realizasaun atividade sira iha área edukativa, sosiál no governu ekleziál nian. Serimónia asinatura ne’e hala’o iha Auditóriu Prezidénsia Konsellu Ministrus nian, iha Palásiu Governu, iha Dili.

Akordu ida-ne’e selebra tuir abrigu konkordata ne’ebé asina iha loron 14 fulan-agostu tinan 2015, entre Repúblika Demokrátika Timor-Leste no Santa Sé, ne’ebé estabelese kuadru jurídiku kona-ba relasaun bilaterál sira entre Estadu rua ne’e nian no husi Akordu-Kuadru ne’ebé asina ona iha loron 16 fulan-juñu tinan 2017 entre Governu no CET. Akordu sira-ne’e prevee kontribuisaun anuál ida, konforme disponibilidade finanseira Governu nian, ba atividade sira karákter sosiál, edukativu no ba atividade sira governu ekleziál Igreja Katólika nian. Kuantitativu no modalidade sira husi konsesaun subvensaun nian, regula tinan-tinan husi akordu espesífiku sira entre Governu no Konferénsia Episkopál Timorense.

Akordu ne’ebé asina daudaun ne’e prevee katak 50% husi valór subvensaun nian sei utiliza ba fin sira karákter ho edukativu, 25% ba fin ho karákter sosiál, 15% ba fin sira governu ekleziál nian no 10% seluk halo jestaun husi subvensaun ne’ebé atribui ona ba nia.

Partisipa iha serimónia ne’e Ministru Prezidénsia Konsellu Ministrus, Fidelis Manuel Leite Magalhães, Ministru Asuntus Parlamentares no Komunikasaun Sosiál, Francisco Martins da Costa Pereira Jerónimo, Ministra Negósiu Estranjeirus no Kooperasaun, Adaljiza Albertina Xavier Reis Magno, Arsebispu Metropolitanu Provínsia Ekleziástika Dili nian, Dom Virgílio do Carmo da Silva, Bispu Dioseze Baukau, Dom Basílio do Nascimento no Núnsiu Apostóliku ba Timor-Leste nian, Joseph Salvador Marino.

url: http://timor-leste.gov.tl?lang=tp&p=26087