……………………………………………………………………………………………………………
Komunikadu Imprensa
Sorumutuk Konsellu Ministrus nian iha loron 13 fulan-novembru tinan 2020
Konsellu Ministru hala’o sorumutuk Palásiu Governu, iha Dili, no aprova ona projetu Rezolusaun Governu nian, kona-ba ezekusaun estratéjia desentralizasaun administrativa no instalasaun órgaun reprezentativu sira ba Podér Lokál, ne’ebé aprezenta husi Ministru Administrasaun Estatál, Miguel Pereira de Carvalho. Atu nune’e, to’o mandatu ikus Governu Konstitusionál da-VIII nian, bele alkansa Administrasaun ka Autoridade Munisipál ida ho estatutu pesoa koletiva públika ho baze institusionál, no autarkia lokál. Rezolusaun Governu nian ida-ne’e mai atu define fila-fali asaun no rezultadu husi projetu balun, ne’ebé prevee ona iha estratéjia desentralizasaun administrativa, nune’e mós estabelese prazu foun sira, iha funsaun viabilidade no kapasidade ezekusaun asaun hirak ne’e nian.
Aprova mós Projetu Rezolusaun Governu nian ne’ebé autoriza Ministru Petróleu no Minerál, Victor da Conceição Soares, atu prosede nomeasaun ba Jonianto Monteiro, hanesan kualidade Vogál nian ba Konsellu Diretivu Autoridade Nasionál Petróleu no Minerál, ba mandatu tinan haat nian.
Konsellu Ministru delibera ona atu fó podér tomak ba Vise-Primeiru-Ministru no Ministru Planu no Ordenamentu, José Maria dos Reis, hafoin koordenasaun ho Ministériu relevante sira, prosede asinatura Akordu Asisténsia Gratuita entre Governu Timor-Leste no Governu Estadus Unidus Amérika nian ba projetu reabilitasaun konjunta Aeródromu Baukau nian.
Ikus liu, aprova ona projetu Deliberasaun, ne’ebé aprezenta husi Ministra Negósius Estranjeirus no Kooperasaun, Adalgiza Albertina Xavier Reis Magno, ba atribuisaun Medalla Méritu, Títulu Póstumu ba Militár na’in lima husi Repúblika Koreia, Membru sira husi Batallaun Sul-Koreanu ROKBATT VII, ne’ebé mate iha Timor-Leste, iha loron 23 fulan-outubru tinan 2003, hodi rekoñese no agradese ba ninia kontributu ne’ebé signifikativu ba pás no estabilidade nasionál. REMATA