Membru foun sira husi Konsellu Administrasaun Sentru Nasionál Chega nian, IP simu pose

Ses. 30 outubru 2020, 15:46h
123293247_179395170468456_6886594020609145481_o

Ministru Prezidénsia Konsellu Ministrus, Fidelis Manuel Leite Magalhães, reprezenta Primeiru-Ministru, Taur Matan Ruak, ohin loron 30 fulan-outubru tinan 2020, fó pose ba membru foun sira husi Konsellu Administrasaun Sentru Nasionál Chega, IP nian, ba períodu tinan tolu 2020-2023, iha serimónia ida ne’ebé hala’o iha instalasaun institutu públiku ne’e nian.

Alzira Sequeira Freitas dos Reis, simu pose hanesan Prezidente Konsellu Administrasaun Sentru Nasionál Chega, IP no Felicidade de Sousa Guterres, hanesan membru Konsellu Administrasaun, sira na’in rua nomeia husi Konsellu Ministrus, iha sorumutuk loron 14 fulan-outubru liubá.

Membru Konsellu Administrasaun sira seluk maka hanesan, Arlindo Francisco Marçal, Jovito Rego de Jesus no Sisto dos Santos, reprezentante Konfisaun Relijioza, Eis-Komisáriu CAVR/CVA no Fongtil, kontinua nafatin iha sira-nia mandatu ba tinan tolu tan.

Ministru Prezidénsia Konsellu Ministrus, iha ninia intervensaun, salienta ba dahuluk “impaktu Sentru Chega nian ba Timor-Leste, ba koezaun nasionál, direitus umanus, demokrasia, ba mehi sivilizasaun nian ida ne’ebé ita hakarak harii”, “iha ne’ebé eziste pás no respeitu ba direitus umanus no ba ema nia dignidade”.

Ba daruak, destaka “impaktu Sentru Chega nian ba polítika esterna Timor-Leste nian”, liuhusi nia kontribuisaun ne’ebé reprezenta “monumentu moris ida”, importante atu labele haluha katak sofrimentu no violasaun hasoru direitus umanus akontese tanba konjuntura polítika internasionál ida”, atu nune’e “ bainhira Timor-Leste, hanesan Estadu, tenke foti desizaun sira iha foru internasionál, iha Nasoins Unidas, la haluha idealizmu ne’ebé motiva ona ema hodi luta ba sira-nia liberdade” no atu “orienta Timor-Leste atu labele kontribui ba desizaun sira ne’ebé hasai ema nia direitu iha rejiaun no iha mundu”.

Ikus liu, Fidelis Magalhães mós hateten katak, “kontribuisaun CNC nian ba umanidade”, “liuhusi lisaun boot ne’ebé reprezenta, husi dokumentu ne’e, husi fatin ne’e no husi valór nobre sira ita-nia povu nian”, “valór domin no perdaun nian, ne’ebé ita timoroan sira tenke sente orgullu”.

Institutu públiku Sentru Nasionál Chega, harii iha fulan-dezembru tinan 2016, ho misaun atu promove implementasaun husi rekomendasaun Komisaun Akollimentu, Lia Loos no Simu malu (CAVR) nian relasiona ho institusionalizasaun ba memória no promosaun direitus umanus nian liuhusi edukasaun no formasaun no solidariedade ho sobrevivente sira ne’ebé vulneravel liu husi violasaun direitus umanus, nune’e mós, rekomendasaun komún nian sira ba CAVR no ba Komisaun Bilaterál Verdade no Amizade (CVA) kona-ba konstrusaun sentru nasionál memória, peskiza no aprendizajen nian ida.

   Ba leten