Mensajen husi Primeiro-Ministro Taur Matan Ruak kona-ba Adezaun Timor-Leste nian ba Movimentu “Scaling Up Nutrition”

Prezidénsia Konsellu Ministrus

VIII Governu Konstitusionál

……………………………………………………………………………………………………………

Loron 13 fulan-outubru tinan 2020

Komunikadu Imprensa

Mensajen husi Primeiro-Ministro Taur Matan Ruak  kona-ba Adezaun Timor-Leste nian ba Movimentu “Scaling Up Nutrition”

Timor-Leste assume kompromissu atu hadi’a kondisaun moris populasaun sira nian, liu-liu ba nia moris-di’ak iha area edukasaun, saude no hahán, no asesu ba servisu no infraestrutura basika, hodi kontribui ba desenvolvimentu no estabilidade ekonomika país nian.

Kompromissu ida ne’e fo berani ba ita nia aposta estrategika atu kombate ki’ak no sub-nutrisaun infantil no familiar, ne’ebé justifika ita nia adezaun ba Movimento Global atu Hadi’a Nutrisaun, konhesidu iha Lian Inglés hanesan SUN Movement ka Scaling Up Nutrition Movement.

Ho hanoin ida ne’e mak ita hakarak mobiliza rekursus humanus no finanseiros hodi hari Paserias Publikas no Privadas foun, atu implementa Roteiru Operasional husi Movimentu SUN iha Timor-Leste, atu apoia planu no politika nutrisaun nasional.

Ita fiar katak, ho apoiu Movimentu SUN iha Timor-Leste, ita sei iha possibilidade atu fo ba labarik sira komesu moris ida di’ak liu, hodi kontribui atu reduz índise sub-nutrisaun no mortalidade infantil no asegura desenvolvimentu sosiedade ida saudavel no ativa, ho labarik sira ne’ebé han di’ak, familia prospera no populasaun forte.

Ha’u hakotu ho agradesimentu espesial ida ba Sua Exelénsia Assistente Sekretáriu Geral Nasõens Unidas nian, nuudár Koordenadora husi Movimentu SUN, Senhora Gerda Verburg, ba apoiu hotu ne’ebé fó tiha ona no ba konfiansa ne’ebé membru sira husi Movimentu Global depozita mai ami. Obrigado barak. REMATA

url: http://timor-leste.gov.tl?lang=tp&p=25893