Orsamentu Jerál Estadu ba tinan 2020 aprova ona iha Parlamentu Nasionál

Iha loron 8 fulan-outubru tinan 2020, Orsamentu Jerál Estadu (OJE) ba tinan 2020, ho montante totál dolar amerikanu millaun rihun 1.497, pasa ona iha Parlamentu Nasionál, ho votu afavór 43, kontra 21 no abstensaun ida.

Projetu proposta Lei OJE tinan 2020 nian, ne’ebé aprezenta husi Governu, hetan ona apresiasaun iha jeneralidade, no aprova ona iha loron 2 fulan-outubru liubá, la iha votu kontra. Molok votasaun finál globál, Orsamentu ne’e debate ona iha plenáriu no vota ona iha espesialidade, ho análize ba artigu ida-idak husi projetu Lei no ba proposta alterasaun 51 ne’ebé promove husi membru sira Parlamentu Nasionál nian.

Lei Orsamentu Jerál Estadu tinan 2020 sei entrega tuir mai ba Prezidente Repúblika, Francisco Guterres Lú Olo, hodi promulga.

Primeiru-Ministru, iha aprezentasaun OJE tinan 2020, fiar katak “ida-ne’e Orsamentu Rezisténsia no Reziliénsia nian, no katak programa, medida no resposta sira ne’ebé aprezenta ona iha ne’e, hatudu klaru kona-ba ezekusaun orsamentál fulan sanulu nian, ne’ebé kontribui ativamente ba mitigasaun impaktu negativu sira ne’ebé kauza husi impase polítiku, husi dezastres naturais no husi krize COVID-19 nian, atu hatán ba nesesidade urjente sira no estabiliza ita-nia sosiedade no ekonomia, iha momentu resesaun no kontrasaun ekonómika ne’ebé belar iha nasaun sira hotu iha Mundu”.

Na’i Ulun ne’e tenik tan katak, ida-ne’e “Orsamentu Esperansa nian iha Retoma no iha Rekuperasaun” no “ hanesan oportunidade ida ne’ebé loos atu labele fila-fali ba kotuk, ba pontu molok krize, maibé atu Transforma Timor-Leste sai nasaun ida ne’ebé sólidu no inkluzivu liután, iha kumprimentu ba Planu Estratéjiku Dezenvolvimentu Nasionál no ba Roteiru Implementasaun ba Objetivu sira Dezenvolvimentu Sustentavel nian”.

Xefe Governu ne’e hakotu ninia intervensaun iha aprezentasaun Proposta Lei nian hodi afirma katak Governu hakarak “país ida ne’ebé iha oportunidade ba ema hotu, país ida ne’ebé iha liberdade, país eskolla nian ida, iha ne’ebé sidadaun ida-idak bele konstroi, ho haksolok, ninia projetu moris nian”.

OJE tinan 2021 mós iha hela faze preparasaun, no Governu sei entrega proposta ne’e ba Parlamentu Nasionál iha loron 15 fulan-outubru oinmai ne’e.

url: http://timor-leste.gov.tl?lang=tp&p=25846