KROP hahú análize ba OJE 2021
Governu, liuhusi Komité Revizaun Polítiku (koñesidu ho akrónimu CROP) hahú ohin, loron 21 fulan-setembru tinan 2020, halo análize ba programa no proposta orsamentál sira husi ministériu no ajénsia autónoma nian sira, hodi haree kona-ba elaborasaun versaun finál projetu Proposta Lei Orsamentu Jerál Estadu (OJE) 2021 nian, atu entrega ba Parlamentu Nasionál to’o loron 15 fulan-outubru.
Kompete ba CROP atu verifika alokasaun estratéjika rekursu husi submisaun orsamentál sira, atubele atinji ba kompromisu no objetivu sira ne’ebé konsta husi dokumentu estratéjiku sira no atu analiza kapasidade ezekusaun planu sira ba tinan finanseiru 2021 nian.
Tuir saída maka define ona iha sorumutuk Konsellu Ministrus nian iha loron 18 fulan-setembru, CROP ne’e maka prezide husi Primeiru-Ministru no kompostu mós husi Vise-Primeiru-Ministru sira, husi Ministru Koordenadór Asuntus Ekonómikus, husi Ministru Finansas no husi Sekretária Estadu Igualdade no Inkluzaun, nu’udar observadora.
CROP ne’e fahe iha Subkomité setoriál haat, Subkomité Setór Institusionál, prezide husi Primeiru-Ministru, Subkomité Setór Sosiál, prezide husi Vise-Primeira-Ministra no Ministra Solidariedade Sosiál no Inkluzaun, Subkomité Setór Infraestrutura sira, prezide husi Vise-Primeiru-Ministru no Ministru Planu no Ordenamentu, no Subkomité Setór Ekonómiku prezide husi Ministru Koordenadór Asuntus Ekonómikus.
Iha loron 21, 22, 26 no 28 fulan-setembru, Subkomité sira sei analiza submisaun orsamentál setoriál nian sira, ne’ebé maka sei realiza iha tempu hanesan, atu iha loron 29 fulan-setembru sei analiza konkluzaun sira ba setór hotu-hotu husi Komité Revizaun Polítiku, ne’ebé maka lidera husi Primeiru-Ministru.
Tetu agregadu ho valór Dolar Amerikanu millaun rihun 1,6, ba OJE 2021, ne’ebé aprova ona iha sorumutuk Konsellu Ministrus iha loron 2 fulan-setembru tinan 2020, bazeia ho análize ne’ebé sei hala’o husi CROP, sei bele hetan ajustamentu sira atu bele hatán ba nesesidade hotu-hotu programa nian no atividade sira hotu ne’ebé relevante husi ministériu no instituisaun Estadu nian sira ba tinan 2021. Versaun finál husi projetu Proposta Lei OJE 2021 nian ne’e, sei submete ba aprovasaun husi Konsellu Ministrus, atu entrega ba Parlamentu Nasionál to’o loron 15 fulan-outubru.
Iha preparasaun ne’e iha mós proposta OJE 2020 nian, ho audisaun sira individuál ka konjunta husi parte Komisaun Espesializada Permanente nian hotu-hotu, ba análize projetu Proposta Lei OJE 2020 nian, ne’ebé entrega husi Governu iha loron 15 fulan-setembru liubá, hahú iha semana ida-ne’e, loron 23 to’o 25 fulan-setembru. OJE 2020 nian ne’e sei halo debate iha jeneralidade husi loron 1 to’o 2 fulan-outubru tinan 2020 no iha espesialidade husi loron 5 to’o 8 fulan-outubru tinan 2020 no redasaun finál sei entrega ba Prezidente Repúblika iha loron 9 fulan-outubru oinmai.
