Parlamentu Nasionál aprova ona pedidu Governu nian atu halo Debate kona-ba OJE 2020 ho karákter urjénsia
Ministru Asuntu Parlamentár no Komunikasaun Sosiál, Francisco Martins da Costa Pereira Jerónimo, no Ministru Finansas, Fernando Hanjam, partisipa ona iha loron 17 fulan-setembru tinan 2020, iha diskusaun no votasaun ba pedidu Governu nian atu halo apresiasaun ho karákter urjénsia ba Orsamentu Jerál Estadu nian (OJE) ba tinan 2020.
Iha sesaun plenária estraordinária, membru Parlamentu Nasionál sira aprova ona pedidu Governu nian ho votu afavór 54, abstensaun 7 no laiha votu kontra.
Iha espozisaun motivu pedidu ne’e nian, Governu hatete katak “Orsamentu Jerál Estadu ne’e nu’udar instrumentu prinsipál husi polítika ekonómika-finanseira Timor-Leste nian, hodi prevee reseita no despeza sira ne’ebé permite kria kondisaun sira ba dezenvolvimentu ekonómiku nasaun nian (...) tanba Estadu mak nafatin sai nu’udar responsavel prinsipál ba promosaun dezenvolvimentu Timor-Leste nian”.
Governu entrega ona Proposta Lei Orsamentu Jerál Estadu (OJE) tinan 2020 nian ba Prezidente Parlamentu Nasionál, Aniceto Guterres, iha loron 15 fulan-setembru tinan 2020 liubá. Tuir kalendáriu prosesu tramitasaun parlamentár nian kona-ba Proposta Lei OJE tinan 2020, iha semana oinmai sei hala’o audisaun individuál ka hamutuk husi parte Komisaun Espesializada Permanente sira. OJE tinan 2020 ne’e sei submete ba diskusaun no votasaun iha jeneralidade iha loron 1 no loron 2 fulan-outubru no iha espesialidade husi loron 5 to’o loron 8 fulan-outubru. Iha loron 9 fulan-outubru redasaun finál husi Dekretu Parlamentu Nasionál nian sei haruka ba Prezidente Repúblika.
OJE tinan 2021 nian mós iha hela preparasaun nia laran, ho análize ba submisaun orsamentál setoriál nian sira husi parte Komité Revizaun Polítiku nian (ne’ebé koñesidu ho akrónimu KROP) ne’ebé sei hahú iha loron-segunda oinmai, loron 21 fulan-setembru atu, hafoin aprovasaun husi Konsellu Ministrus, sei entrega ba Parlamentu Nasionál to’o loron 15 fulan-outubru.
