A Sekretaria Estadu ba Komunikasaun sosiál Social sei promove, iha loron 18 fulan-setembru, Lansamentu kampaña nasionál KOMBATE HOAX (Kontra Lia-Falsu), husi tuku 15 to’o tuku 18.

lntensaun hosi lansamentu ida ne’e, atu hasa’e ema hotu-hotu nia konsiénsia kona-ba impaktu negativu hosi HOAX ba sosiedade no oinsá atu reduz sirkulasaun HOAX liuhusi asaun rezeita fahe tutan informasaun falsu hodi evita sosiedade konsume informasaun ne’ebé laloos.

Eventu ida-ne’e sei hahú tuku 15 ho marsa dame husi Palásiu Governu to’o Largu Lesidere, ne’ebé sei hala’o atividade sira seluk.

Iha Largu Lesidere, programa inklui intervensaun no aprezentasaun husi Arsebispu Arkidioseze Díli, Dom Virgílio do Carmo da Silva, Sekretáriu Estadu ba Komunikasaun Sosiál, Merício Juvinal dos Reis “Akara”, Sekretáriu Estadu Juventude no Desportu, Abrão Saldanha, Diretor Ezekutivu TIC TIMOR I.P, Roberto Caetano de Sousa Vicente, Prezidente Autoridade Nasionál Komunikasoins (ANC), João Olívio Freitas, Presidente Autoridade Munisipál Díli, reprezentante Polísia Sientífika Investigasaun Kriminal Timor-Leste (PSIK), reprezentante husi operador nasionál tolu.

Eventu iha mós muzika no teatru husi grupu The Kraken no partisipasaun Komunidade Youtuber Timor-Leste no mós NOFI-grupu promove internet saudável.