Serimónia Enseramentu ba CNEFP nia Siklu Formasaun ba períodu 2019/2020

Iha loron 11 fulan-setembru tinan 2020, iha Serimónia Enserramentu ba SNEFP nia Siklu Formasaun ba períodu 2019/2020 no Inísiu husi Siklu Formasaun foun, husi Sentru Nasionál Empregu no Formasaun Profisionál (SNEFP), iha Tibar, iha Munisípiu Likisá.

Serimónia ne’e konta ho prezensa husi Ministru Koordenadór Asunstus Ekonómikus, Joaquim Amaral, Ministru Asuntus Parlamentares no Komunikasaun Sosiál, Francisco Martins da Costa Pereira Jerónimo, Ministru Edukasaun, Juventude no Desportu, Armindo Maia, Sekretáriu Estadu ba Komunikasaun Sosiál Merício Juvinal dos Reis “Akara”, Embaixadór Portugál iha Timor-Leste, José Pedro Machado Vieira, nune’e mós reprezentante sira seluk husi liña ministeriál sira, husi Rejiaun Administrativa Espesiál Oekusi Ambenu (RAEOA), F-FDTL, instituisaun públika no privadu sira, indústria no parseiru nasionál no internasionál sira SNEFP nian.

Iha serimónia ne’e, entrega ona mós sertifikadu aproveitamentu nian husi Nivel I no II nian ba formandu hamutuk 96 iha área sira hanesan Konstrusaun Sivíl, Karpintaria, Kanalizasaun, Eletrisidade, Soldadura, Painél Solár, Agrikultura no Ospitalidade.

Entre formandu sira-ne’e, na’in sanulu maihusi militár Komponente Navál F-FDTL nian,  iha formasaun ida-ne’ebé hetan apoiu husi Governu australianu, liuhusi Kooperasaun Tékniku Militár DCP (Programa Kooperasaun iha Defeza), no ho ninia objetivu maka fó kapasitasaun téknika ba militár sira, ne’ebé iha futuru sei asegura manutensaun frota Mariña nian.

Ministru Koordenadór Asuntus Ekonómikus, iha ninia diskursu, felisita formandu sira no enkoraja sira iha sira-nia integrasaun iha merkadu serbisu nian.

Joaquim Amaral, destaka tan katak “SNEFP ne’e nudár sentru ida-ne’ebé fó oportunidade formasaun nian ho kualidade di’ak liu iha Timor-Leste” no “área sira, iha ne’ebé sentru ne’e fó formasaun hanesan konstrusaun sivíl, agrikultura no ospitalidade, nudár área sira ne’ebé hatán diretamente ba ita-nia nesesidade sira”.

url: http://timor-leste.gov.tl?lang=tp&p=25592