Ministru husi Repúblika Demokrátika Kongo reforsa importánsia husi Sorumutu hirak Díli nian
Ministru ba Planeamentu husi Repúblika Demokrátika Kongo (RDK) konsidera pozitiva tebe-tebes ba konversasaun hirak ne’ebé hala’o daudaun iha kapitál Timor-Leste nian.
Olivier Kamitatu, iha entrevista ba Portál Governu nian, haksolok tebe-tebes ho empeñu partisipante sira nian, liu-liu husi sira Estadu hirak ne’ebé ladún metin, bainhira buka dalan hodi rezolve sira nia difikuldade sira.
Reprezentante husi RDK ida ne’e, fó hanoin katak, sorumutu hirak ne’e hala’o tanba Sorumutu “g7+” nian ne’ebé hala’o tiha ona iha tinan rua ba kotuk, iha Kinshasa, kapitál Repúblika Demokrátika Kongo nian.
Ministru Olivier Kamitatu hato’o mós nia esperansa katak, dokumentu nu’udar rezultadu husi sorumutu hirak ne’e, Deklarasaun Díli nian, bele ajuda Estadu hirak ne’ebé ladún metin sira atu hetan forma ida ne’ebé diak liu hodi dinamiza dezenvolvimentu ba sira nia rain.
Bele hetan vídeo sira hotu husi eventu ida-ne’e iha seksaun Multimédia/Vídeo.
