Toleránsia de Pontu ba okaziaun Komemorasaun Aniversáriu Konsulta Popular ba dala 21
Prezidénsia Konsellu Ministrus
VIII Governu Konstitusionál
...........................................................................................................................
loron 28, fulan-agostu, tinan 2020
Komunikadu Imprensa
Toleránsia de Pontu ba okaziaun Komemorasaun Aniversáriu Konsulta Popular ba dala 21
Atu selebra loron 30 fulan-agostu, Loron Konsulta Populár nian, ne’ebé tinan ida-ne’e monu iha domingu, Governu deside ona hodi fó toleránsia pontu iha segunda, loron 31 fulan-agostu, ba funsionáriu no ajente ministériu sira nian ka servisu sira ne’ebé depende ba ministériu sira-ne’e, nune’e mós institutu no organizmu sira ne’ebé integra iha administrasaun indireta Estadu nian, hodi fó biban ba sira atu partisipa iha selebrasaun ne’e no fila ba sira-nia serbisu.
Desizaun ida-ne’e foti tuir Lei n. 10/2005, loron 10 fulan-agostu, ne’ebé determina kona-ba loron feriadu nasionál nian sira, data ofisiál komemorativa sira no regra sira kona-ba toleránsia pontu.
Governu apela ba populasaun atu selebra loron ne’e, ne’ebé importante tebes iha ita-nia istória koletiva, nu’udar Povu no nu’udar Nasaun, iha família no ho sira-nia komunidade, hodi fó omenajen ba korajen no rezilénsia husi ita-nia Povu ne’ebé hatudu ona ho determinasaun, ninia hakarak atu ita-nia Nasaun ukun rasik an. REMATA
