Governu hato’o nia solidariedade ba Líbano

Prezidénsia Konsellu Ministrus

VIII Governu Konstitusionál

……………………………………………………………………………………………………………

Loron 6 fulan-agostu tinan 2020

Komunikadu Imprensa

Governu hato’o nia solidariedade ba Líbano

Lori povu Timor-Leste nia naran, Governu hato’o kondolénsia ba família no belun sira ba vítima sira husi esplozaun ne’ebé akontese iha rejiaun portu Beirute nian, iha Líbanu, iha tersa, loron 4 fulan-agostu tinan 2020. Governu manifesta mós ninia solidariedade ba Governu no povu Líbanu, ne’ebé enfrenta efeitu husi katástrofe ne’e.

Esplozaun forte ida ne’ebé harahun Portu Beirute nian, ne’ebé hamosu ondas sízmikas ne’ebé mak hanesan ho rai nakdoko ida iha eskala Richter 3,3, hodi estraga sasán barak iha kuaze metade husi sidade, ema 100 resin maka mate, rihun lima resin kanek no rihun 300 maka lakon sira-nia hela-fatin.

Portavós Governu Konstitusionál VIII nian, Ministru Fidelis Manuel Leite Magalhães, hateten katak “ami-nia sentimentu hato’o ba família sira ne’ebé mak lakon sira-nia ema ne’ebé sira hadomi no ami hahí ba sira ne’ebé kontinua buka ema sira ne’ebé maka lakon. Timor-Leste solidáriu ho Governu no povu Líbanu, iha loron difisil hirak ne’e no iha dezafiu sira-ne’ebé sira hasoru iha semana no fulan sira tuirmai”. REMATA

url: http://timor-leste.gov.tl?lang=tp&p=25361