Ministériu Saúde rejista kazu foun COVID-19 no apela ba populasaun atu hakmatek nafatin no kontinua ho medida sira prevensaun nian

Ter. 04 agostu 2020, 16:25h
116872312_1659983820824386_6212424436502856346_o

Vise-Koordenadór-Jerál, Narciso Fernandes, fó sai, ohin, loron 4 fulan-agostu tinan 2020, rejistu kazu infesaun COVID-19 foun ida.

Ida-ne’e hanesan kazu COVID-19 dahuluk iha país ne’e, dezde loron 15 fulan-maiu tinan 2020, hodi aumenta númeru ema ne’ebé infetadu ba 25, iha ne’ebé pasiente na’in 24 maka rekupera ona husi moras ne’e.

Narciso Fernandes esplika katak infetadu foun ne’e sidadaun estranjeiru ida ne’ebé tama mai Timor-Leste, liuhusi fronteira rai-maran no daudaun ne’e iha hela kuarentena, iha Tasitolu, iha Dili.

Pasiente ne’e halo viajen ho aviaun, iha loron 21 fulan-jullu, husi Java Sentrál ba Kupan, no husi ne’ebá, iha loron 22 fulan-jullu, halo viajen ho karreta to’o fronteira ho Timor-Leste, ho pasajeiru na’in haat no kondutór na’in ida. Iha fronteira, sira hamutuk ho grupu ida ho ema na’in 105 ne’ebé tama legálmente mai país no ema na’in 6 ne’ebé tama tuir dalan ilegál no sira hotu tula ba instalasaun kuarentena nian, iha Tasitolu. Iha loron 30 fulan-jullu, halo teste COVID-19 ba sira-hotu, no ohin konfirma ona katak iha rezultadu pozitivu ida. Pasiente ne’e agora iha ona izolamentu iha Klínika Vera Cruz.

Vise-Koordenadór-Jerál ne’e informa mós katak to’o ohin loron hala ona teste ba ema na’in 4.244, husi ema sira ne’e, na’in 4.186 maka hetan rezultadu negativu, na’in 25 hetan rezultadu pozitivu no na’in 33 hein hela rezultadu teste nian. Daudaun ne’e, ema na’in 256 mak hela iha kuarentena no instalasaun Estadu nian no na’in 144 mak hela iha autokuarentena.

Ho evolusaun surtu COVID-19 iha mundu, Ministériu Saúde apela ba populasaun atu hakmatek nafatin no kontinua ho medida prevensaun COVID-19 nian sira:

✅ Fase liman beibeik

✅ Me’ar no fani karik taka ibun ho liman sikun laran - labele ho liman laran!

✅ Keta kaer matan, inus no ibun

✅ Keta halibur malu iha grupu ne’ebé envolve ema barak

✅ Keta kontaktu besik ho ema sira ne’ebé moras

✅ Hamoos no dezinfeta beibeik sasán no superfísie sira

   Ba leten