Komemorasaun Loron Idul Adha 2020

Prezidénsia Konsellu Ministrus

VIII Governu Konstitusionál

……………………………………………………………………………………………………………

Loron 30 fulan-Jullu tinan 2020

Komunikadu Imprensa

Komemorasaun Loron Idul Adha 2020

Governu Konstitusionál da-8 hato’o ninia felisitasaun ba komunidade musulmana Timor-Leste nian, iha selebrasaun sira Idul Adha nian, katak tinan ida-ne’e sei selebra aban, loron 31 fulan-jullu.

Idul Adha, koñesidu mós hanesan Festa Boot ka Festa Sakrifísiu (karan) nian, nu’udar solenidade ida ne’ebé mak importante tebtebes iha relijiaun musulmana, ne’ebé fó hanoin fali karan Abraão nian, ne’ebé hala’o hafoin peregrinasaun ba Meka. Komemorasaun ne’e hala’o hahú iha loron dasanuluk fulan-Dhu Al-Hijjah (fulan ikus husi tinan fulak nian, iha kalendáriu izlaun nian).

Povu Timor-Leste halibur nafatin tradisaun, kultura no relijiaun oin oin sira ne’ebé sai hanesan karaterístika nasaun no hatudu valór universál sira hanesan perdaun, amizade, toleránsia no dame.

Ministru Prezidénsia Konsellu Ministrus no Porta-Voz Governu nian, Fidelis Manuel Leite Magalhães, hodi Governu no Povu Timoroan tomak nia naran, hakarak felisita komunidade musulmana Timor-Leste no iha mundu nian, ba selebrasaun festa Idul Adha ida ne’ebé nakonu ho ksolok. Governante ne’e hato’o mós katak, “ ho espíritu Idul Adha nian, komunidade musulmana kontinua kontribui maka’as ba dezenvolvimentu nasionál no Timor-Leste kontinua sai nu’udar ezemplu ida solidariedade no armonia relijioza nian, iha rejiaun no iha mundu, nafatin kontinua hanesan naroman ida husi valór valiozu hirak ne’e”. REMATA

url: http://timor-leste.gov.tl?lang=tp&p=25297