Primeiru-Ministru, Taur Matan Ruak, konvoka sorumutuk ida, iha loron 27, fulan-jullu, tinan 2020, ho Vise Primeiru-Ministru, José Maria dos  Reis, Ministru Obras Públikas, Salvador Soares dos Reis Pires, Ministru Transportes no Komunikasoins, José Agustinho da Silva, no mós Ministru Prezidénsia Konsellu Ministrus, Fidélis Leite Magalhães, hodi diskute no define programa propriedade sira iha área infraestrutura nian ba tinan finanseiru 2021.

Xefe Governu hateten katak prioridade Governu nian ida mós ba tinan 2021 maka kriasaun kampu traballu ba timoroan sira, atubele hasa’e kreximentu ekonómiku.

Prioridade sira ba infraestrutura, ne’ebé atu inklui iha Orsamentu Jerál Estadu nian ba tinan 2021, liga mós ba rekomendasaun sira hosi Komisaun ba Elaborasaun Planu Rekuperasaun Ekonómika, no área sira-ne’e maka kriasaun infraestrutura sira ba bee moos, eletrisidade, saúde, edukasaun, agrikultura, uma ba komunidade no konkluzaun ba projetu sira ne’ebé la’o hela

Primeiru-Ministru propoin atu harii ekipa task force ida ba área prioridade nian ida-idak, atubele aselera prosesu implementasaun ho forma integrada no iha kontrolu ida de’it, atubele hamenus burokrasia institusionál.

Iha sorumutuk ne’e, Xefe Governu orienta Vise Primeiru-Ministru no Ministru sira seluk ne’ebé mak partisipa, atu diskute kle’an liután kona-ba prioridade sira ne’ebé define ona, hodi bele define ida ne’ebé mak urjente liu atu implementa iha tempu badak nia laran no bele kontribui ba kreximentu ekonómiku.