Ministru Obras Públikas simu rezultadu husi auditoria sosiál iha área infraestruturas nian
Ministru Obras Públikas, Salvador Soares dos Reis Pires, simu ona ekipa ida husi reprezentante organizasaun sosiedade sivíl nian, ne’ebé lidera husi Diretór Ezekutivu husi Forum Organizasaun Naun Governamentál sira Timor-Leste (FONGTIL), Daniel Santos do Carmo, iha loron 23 fulan-jullu tinan 2020, hodi simu rezultadu sira husi relatóriu auditoria sosiál nian, ba
Relatóriu ne’e, ne’ebé FONGTIL no Rede Nasionál Auditoria Sosiál nian (ReNAS), maka prepara, ho partisipasaun husi organizasaun naun governamentál (ONG) sanulu no liuhusi parseria ho Governu, aprezenta konkluzaun no rekomendasaun sira husi rekolla no análize ba dadus kona- ba área sira hanesan edukasaun, agrikultura, área sosiál no infraestruturas.
Programa ida-ne’e ninia objetivu mak atu kontribui ba melloria husi kualidade servisu públiku sira-nian no ba efetividade husi polítika públika sira, liuhusi ninia adaptasaun ba kontestu sosiál, ekonómiku, polítiku, ambientál no kulturál.
Kona-ba setór infraestruturas nian, relatóriu ne’e haree liu ba monitorizasaun ba implementasaun Programa Dezenvolvimentu Integradu Munisípiu sira nian no ba monitorizasaun husi polítika orsamentál nian ba estrada Dili – Manatutu no estrada Baukau – Vikeke.
Durante aprezentasaun ne’e, Diretór FONGTIL informa katak sosiedade sivíl valoriza serbisu ne’ebé Ministru Obras Públikas hala’o, ne’ebé durante ninia mandatu, implementa ona projetu sira husi área infraestruturas ho dalan ne’ebé transparente.
Ministru Obras Públikas agradese ba knaar ne’ebé sosiedade sivíl dezempeña, iha apoiu no iha fiskalizasaun ba serbisu ne’ebé Governu dezenvolve ona iha área infraestruturas nian.
Partisipa mós iha enkontru ne’e maka Diretór Ezekutivu ONG Luta Hamutuk nian, José Alves da Costa, reprezentante sira seluk husi ONG ne’ebé partisipa ona iha peskiza no análize ba dadus kona-ba infraestruturas, no mós reprezentante sira husi Gabinete Apoiu ba Sosiedade Sivíl, Gabinete Primeiru-Ministru nian.
