Governu Timor-Leste

Ministra Saúde, Odete Maria Freitas Belo, no Vise-Ministru Interiór, António Armindo, hala’o sorumutuk iha loron 22 fulan-jullu tinan 2020, hodi diskute planu kontinjénsia nian, ne’ebé ministériu rua ne’e sei prepara hela. Planu ne’e inklui prosedimentu no medida sanitária sira ba protesaun saúde públika, ne’ebé sei adota bainhira funsionamentu fronteira sira-nian la’o normál filafali ona.

Sorumutuk ne’e ninia objetivu prinsipál maka atu koordena hamutuk estratéjia polítika ida, hodi prepara kondisaun infraestrutura no fatin kuarentena nian, iha postu fronteira nian sira.

Iha fulan kotuk, Governu, liuhusi Ministériu Interiór, autoriza Servisu Migrasaun loke fali fronteira rai-maran semana ida dala ida, iha loron-kuarta, husi tuku 10 to’o tuku 12, liuliu atu simu sidadaun timoroan sira.

Maske Timor-Leste laiha kazu ativu dezde fulan-maiu tinan 2020, iha nafatin preokupasaun, karik bele mosu filafali kazu foun KOVID-19, tanba númeru infetadu sira iha nivel mundiál sa’e ba beibeik. Iha nivel rejionál, númeru infetadu iha nasaun viziña Indonézia sa’e nafatin, liuliu iha provínsia Sonda Orientál (Nusa Tenggara Timur, NTT), iha ne’ebé parte osidentál illa Timor nian halo parte. Tanba ne’e, importante tebes atu adota medida oioin kona-ba prevensaun, atu labele mosu fali kazu foun KOVID-19 iha país ne’e.

Iha faze ida-ne’e, koordenasaun no planeamentu entre liña ministeriál sira importante tebetebes, atu nune’e  bele mantein kontrolu fronteira nian no estabelese mekanizmu operasionál sira, hodi mantein triajen no rastreiu iha sentru kuarentena nian sira no iha zona sira-seluk ne’ebé identifika ona, atu evita foku kontaminasaun foun nian sira.

Vise-Ministru Interiór agradese ba hanoin no kontribuisaun sira husi Ministra Saúde no hatudu kompromisu atu kontinua koopera ho Ministériu Saúde, atubele garante katak sidadaun hotu-hotu ne’ebé tama mai territóriu nasionál, sei halo tuir protokolu saúde nian no períodu loron 14 kuarentena nian.