BNCTL agradese serbisu ne’ebé hala’o husi eis-reprezentante Estadu nian nu’udar asionista instituisaun ne’e nian
Konsellu Administrasaun Banku Nasionál Komérsiu Timor-Leste (BNCTL, sigla iha lian portugés) organiza ona iha loron 17 fulan-jullu tinan 2020, serimónia agradesimentu nian ida ba Ministru Prezidénsia Konsellu Ministrus, Fidelis Manuel Leite Magalhães, ba funsaun ne’ebé nia hala’o ona hanesan reprezentante husi Estadu nu’udar asionista Instituisaun bankária ne’e nian.
BNCTL harii hahú husi Institutu Mikrofinansas Timor-Leste (IMFTL) no sai Banku Timoroan dahuluk bainhira hetan lisensa bankária sein restrisaun sira, iha loron 11 fulan-jullu tinan 2011.
Banku ida-ne’e nu’udar sosiedade anónima ho kapitál tomak mesak públiku de’it, iha ne’ebé Estadu maka sai nu’udar asionista úniku no ninia objetivu maka prestasaun servisu bankáriu no finanseiru ho hanoin atu hamenus moris-kiak no favorese dezenvolvimentu atividade ekonómika iha territóriu nasionál tomak, hodi fornese asesu ba servisu finanseiru ba populasaun no ba empreza mikro, empreza ki’ik no empreza média sira, tantu iha área urbana sira nune’e mós iha área rurál sira.
Iha ninia intervensaun, Ministru hateten katak “nu’udar priviléjiu ida, iha tinan rua ikus ne’e nia laran, partilla [ho membru Konsellu Administrasaun BNCTL nian sira] momentu no situasaun oin-oin, maske difisil, importante tebetebes ba prosesu maturidade Banku nian no ba ita-nia ekonomia rasik”
Fidelis Magalhães hateten klaru katak “ho alterasaun ne’ebé halo ona ba Konsellu Administrasaun, ho objetivu atu asegura funsionamentu ida-ne’ebé efisiente liután, hein katak iha tempu besik nia laran, ho imi-nia serbisu no dedikasaun, bele hakle’an, atu BNCTL transforma an la’ós de’it sai Banku Governu nian, maibé sai Banku ida, iha ne’ebé ita-nia sidadaun sira laran-metin, tanba sente katak serbisu ne’ebé imi halo ne’e nia kualidade boot tebes”.
Governante ne’e apela mós ba membru Konsellu Administrasaun nian sira atu “buka garante katak BNCTL bele transforma an duni sai instituisaun ida-ne’ebé fó funan no kontribui duni ba prosesu dezenvolvimentu ekonómiku ita-nia nasaun nian”. 
Fidelis Magalhães, nu’udar Ministru Reforma Lejizlativa no Asuntus Parlamentares, ne’ebé mak dezignadu, liuhusi Dezpaxu N. 01 /MEPCM/VIII/2018, loron 17 fulan-agostu, atu reprezenta Estadu hodi ezerse ninia direitu nu’udar asionista úniku BNCTL nian. Ho alterasaun Orgánika VIII Governu Konstitusionál nian, halakon tiha Ministériu Reforma Lejizlativa no Asuntus Parlamentares no, tanba ne’e, mandatu Fidelis Manuel Leite Magalhães nian, ne’ebé fó ona ba nia liuhusi Despaxu Konjuntu ne’e, kaduka ona.
sei publika
