Ministru Justisa, Manuel Cárceres da Costa, simu, iha loron 9 fulan-jullu tinan 2020, ekipamentu informátiku lubun ida ba Sistema Informasaun Jestaun Demográfika Nasionál nian, ne’ebé oferese husi Governu Japaun no husi Fundu Nasoins Unidas nian ba Infánsia (UNICEF).

Sistema ne’e sei permite rekolle, arkiva no jere dadus rejistu sivíl nian, inklui rejistu moris, ho objetivu atu hametin sistema universál nasionál rejistu moris nian.

Implementasaun ba projetu ida-ne’e hala’o husi Ministériu Justisa, ho koordenasaun ho UNICEF no ministériu relevante sira seluk, no mai husi akordu ne’ebé hala’o ona iha tinan 2018, entre Governu Japaun no UNICEF, iha ne’ebé, Governu Japaun fó doasaun ida ho valór dolar amerikanu millaun 2,5 atu, iha tinan tolu nia laran, dezenvolve sistema rejistu funsionál no efisiente nian ida iha nasaun ne’e, ne’ebé inklui labarik sira-hotu.

Hadi’a efisiénsia husi sistema rejistu moris ne’e sei sai hanesan baze ba dezenvolvimentu sustentavel nasaun nian, hodi garante katak labarik sira-hotu bele asesu ba sira nia direitu, hanesan edukasaun, saúde no protesaun sivíl, hahú kedas husi moris, hodi kontribui ba esforsu sira Governu nian atu garante rejistu moris ba sidadaun sira-hotu.

Serimónia ne’e hala’o iha Diresaun Nasionál Rejistu no Notariadu, iha Dili, no hetan partisipasaun husi Embaixadór Japaun ba Timor-Leste, Masami Kinefuchi, husi reprezentante UNICEF iha Timor-Leste, Valerie Taton, husi Vise-Reprezentante UNICEF iha Timor-Leste, Scott Whoolery, husi Sekretáriu Estadu Terras no Propriedades, Mário Ximenes, no husi Diretór-Jerál Servisu Rejistu no Notariadu, Crisogno da Costa.