Ministru Prezidénsia Konsellu Ministrus simu família husi vítima trajédia Kuluhun
Ministru Prezidénsia Konsellu Ministrus, Fidelis Manuel Leite Magalhães, iha loron 10 fulan-jullu tinan 2020, iha Palásiu Governu, iha Dili, simu familiares husi vítima sira trajédia Kuluhun nian.
Durante sorumutuk ne’e, Ministru rona preokupasaun no difikuldade ne’ebé maka sente husi família foin-sa’e na’in tolu, ne’ebé maka mate iha madrugada loron 18 fulan-novembru tinan 2019, iha festa ida iha bairru Kuluhun, iha Dili, ne’ebé hetan tiru husi ajente Polísia Nasionál Timor-Leste (PNTL) nian, bainhira la hala’o sira nia knaar nu’udar polísia. Iha insidente ne’e mós ema na’in lima hetan kanek.
Ajente na’in rua ne’ebé tiru ne’e hetan kondenasaun, iha loron 27 fulan-marsu liubá, ho pena prizaun ba tinan 20 no tinan 25, tanba krime omisídiu tolu no krime omisídiu iha forma tentada lima.
Ministru Prezidénsia Konsellu Ministrus lamenta tebes kona-ba mate foin-sa’e na’in tolu ne’e nian no afirma katak sei fasilita koordenasaun ho Primeiru-Ministru no ho ministériu relevante sira, liuliu Ministériu Seguransa Sosiál no Inkluzaun, Ministériu Saúde no Ministériu Interiór, atu buka solusaun hodi bele ultrapasa situasaun ne’e no rezolve difikuldade família sira vítima trajédia Kuluhun nian.
