Primeiru-Ministru, Taur Matan Ruak, prezide ohin, loron 12 fulan-juñu tinan 2020, iha sala Konsellu Ministrus nian, iha Dili, sorumutuk ida ho Komisaun Interministeriál ba Koordenasaun atu Implementa Medida sira ba Prevensaun no Kontrolu ba Koronavirus foun (SARS-CoV-2) ho koordenadór sira Sala Situasaun nian husi Sentru Integradu ba Jestaun Krize (SIJK) nian.

Durante sorumutuk ne’e, koordenadór sira husi Sala Situasaun, husi Sentru Integradu ba Jestaun Krize nian, aprezenta ona ba Komisaun Interministeriál avaliasaun kona-ba situasaun jerál iha nasaun, rezultadu husi medida sira ba prevensaun no kombate SARS-CoV-2 ne’ebé implementa ona no opsaun no rekomendasaun sira ba estratéjia ne’ebé atu halo tuir hafoin remata faze datoluk estadu emerjénsia nian, ne’ebé oras ne’e vigora hela.

Primeiru-Ministru manifesta orgullu ba serbisu ne’ebé SIJK hala’o ona, ne’ebé permite katak oras ne’e Timor-Leste la iha kazu ativu SARS-CoV-2.

Xefe Governu orienta membru SIJK nian sira atu halo relatóriu ida kona-ba atividade sira ne’ebé hala’o ona, atubele aprezenta ba Parlamentu Nasionál, no alerta kona-ba nesesidade SIJK no Ministériu relevante hotu-hotu nian, liuliu Ministériu Saúde, atu kontinua ho reforsu ba kapasidade institusionál no ba infraestrutura sira-ne’ebé presiza ba prevensaun no kombate COVID-19.

Timor-Leste rejista totál kazu pozitivu konfirmadu hamutuk 24 husi ema sira ne’ebé infetada husi Koronavirus foun no kazu provavel haat. Pasiente hotu-hotu di’ak fali ona no hahú kedas husi loron 15 fulan-maiu la iha kazu ativu iha territóriu nasionál.

Koronavirus foun mosu iha tinan kotuk nia rohan, iha sidade Wuhan, iha Xina, no autoridade xineza sira reporta ba dala uluk ba Organizasaun Saúde Mundiál (OSM) kona-ba kazu ne’e iha loron 31 fulan-dezembru tinan 2019.

COVID-19 infeta ona ema millaun 7,5 resin no ema rihun 420 maka mate ona iha nasaun no territóriu hamutuk 213. Ema millaun 3,8 maka di’ak ona husi moras ne’e.