Sorumutuk Komisaun Interministerial ba Koordenasaun husi Medida sira ba Prevensaun no Kontrolo COVID-19

Ses. 10 abril 2020, 12:44h

Primeiru-Ministru, Taur Matan Ruak, ohin, loron 10 fulan-abríl tinan 2020, iha Sentru Konvensaun Dili (CCD), prezide sorumutuk ida husi Komisaun Interministeriál koordenasaun nian ba implementasaun medida sira ba prevensaun no kontrolu Koronavirus foun ( SARS-CoV-2) ho koordenadór sira Sala Situasaun nian, husi Sentru Integradu Jestaun Krize nian. Membru Governu nian hotu-hohtu partisipa iha Sorumutuk ne’e.

Durante sorumutuk ne’e, koordenadór sira husi Sala Situasaun, Sentru Integradu Jestaun Krize nian, hato’o ba Komisaun Interministeriál, avaliasaun kona-ba situasaun jerál iha nasaun ne’e no rezultadu sira husi medida sira ba prenvensaun no kombate hasoru SARS-CoV-2, ne’ebé implementa ona durante loron sanulu-resin-haat dahuluk vijénsia estadu emerjénsia nian.

Koordenadór sira husi Sala Situasaun nian halo mós aprezentasaun ida kona-ba objetivu operasionál haat atu mantein ka hamenus indíse propagasaun husi COVID-19: garantia kuarentena ne’ebé adekuada ba sidadaun sira ne’ebé to’o mai Timor-Leste no ema sira ne’ebé iha ona kontaktu ho kazu pozitivu sira SAR-CoV-2; identifikasaun kazu suspeitu sira, realizasaun teste laboratóriu no halo izolamentu ba kazu pozitivu COVID-19 nian sira; preparasaun fatin sira ba izolamentu no tratamentu, relasiona ho akizisaun ekipamentu, ai-moruk no intalasaun sira, mobilizasaun no formasaun rekursus umanus; no reforsu ba medida sira ba kontensaun, hanesan ijiene pesoál, distansiamentu sosiál no fíziku, no konfinamentu voluntáriu.

Durante surumutuk ne’e, koordenadór sira husi Sala Situasaun nian, hato’o ba membru Governu sira katak pasiente ne’ebé infetadu ona husi Coronavirus foun, ne’ebé rejistadu iha loron 21 fulan-marsu, la hatudu ona sintoma sira no hafoin teste dala rua ho rezultadu negativu, hetan ona alta médika no agora fila ona hodi hela iha kuarentena iha uma durante loron sanulu-resin-haat.

Fó sai ona mós kazu pozitivu foun ida, husi sidadaun ida ne’ebé tama mai nasaun ne’e iha loron 1 fulan-abríl liubá, liuhusi fronteira terrestre no daudaun ne’e hela kuarentena iha fatin konfinamentu obrigatóriu nian ida mós ne’ebé Governu harii ona. Pasiente ne’e, hatudu sintoma sira ne’ebé kmaan no  daudaun ne’e hela iha izolamentu. Sei identifika mós ema hotu-hotu ne’ebé halo ona kontaktu ho pasiente ne’e atubele halo teste diagnóstiku COVID-19 nian.

 

   Ba leten