Governu Timor-Leste

Primeiru-Ministru, Taur Matan Ruak, prezide, iha domingu, loron 30 fulan-marsu tinan 2020, iha Sentru Konvensaun Dili, (CCD), sorumutuk Komisaun Interministerial ba koordenasaun kona-ba implementasaun medida prevensaun no kontrolu surtu Koronavirus ka COVID-19.

Iha sorumutuk ne’e, Ekipa husi Gabinete Jestaun Krize nian halo aprezentasaun ida kona-ba preparativu sira Gabinete ne’e nian kona-ba mekanizmu serbisu, ne’ebé sei halo jestaun kona-ba luta kontra Koronavirus ka COVID-19, hodi envolve liña ministeriál sira-ne’ebé relevante, ne’ebé kria tiha ona. Gabinete Primeiru-Ministru nian maka sei koordena serbisu ne’e, ho tutela direta husi Primeiru-Ministru rasik.

Husi parte Komisaun Téknika nian, ne’ebé lidera hosi Dra. Odete Viegas, halo mós aprezentasaun ba liña ministeriál sira kona-ba serbisu sira ne’ebé la’o ona dezde komisaun téknika ne’e estabelese, kona-ba nia progresu, dezafiu no rekomendasaun sira, no aprezenta akompañamentu (follow-up) atu serbisu sira tuirmai bele efetivu liután.

Hafoin aprezentasaun, Xefe Governu esplika katak kriasaun Gabinete Jestaun krize nian ne’e bazeia ba lei, no katak Gabinete ida-ne’e sei ajuda liña interministeriál sira atu serbisu ho dalan ne’ebé sistemátiku, organizadu no efikás liután, tuir ida-idak nia papél, hodi ajuda serbisu Ministériu Saúde nian iha liña oin iha luta kontra COVID-19.

Xefe Governu sei integra Komisaun Téknika, ne’ebé lidera hosi Dra. Odete, no tutela ba Gabinete Jestaun Krize, atu nune’e iha liña orientasaun ida de’it ho komandu Gabinete Jestaun ba Krize.

Ekipa Gabinete Jestaun ba Krize daudaun ne’e lidera hosi Kapitaun-de-Mar-i-Gerra, Donaciano Gomes, Pedro Klamar Fuik, ho apoiu hosi eis-Primeiru-Ministru, Dr. Rui Maria Araújo no eis-Sekretáriu Estadu Seguransa, Francisco Guterres. Funsaun ekipa ne’e nia mak konklui preparativu hotu-hotu kona-ba mekanizmu serbisu nian hodi aprezenta filafali ba Xefe Governu atu hetan aprovasaun, no nune’e bele hahú ona serbisu ne’ebé efetivu.

Komisaun Interministeriál ne’e komposta hosi:

Primeiru-Ministru, Taur Matan Ruak, ne'ebé prezide;

Ministra Saúde iha ezersísiu, Élia António de Araújo dos Reis Amaral;

Ministru Koordenadór Asuntus Ekonómikus, Fidelis Manuel Leite Magalhães

Ministra Finansas iha ezersísiu, Sara Lobo Brites;

Ministru Negósius Estranjeirus no Kooperasaun, Dionísio da Costa Babo Soares;

Ministru Administrasaun Estatál iha ezersísiu, Abílio José Caetano;

Ministru Transportes no Komunikasoins, José Agustinho da Silva;

Ministru Defeza no Ministru Interior iha ezersísiu, Filomeno da Paixão de Jesus;

Ministru Justisa, Manuel Cárceres da Costa;

Ministra Solidariedade Sosiál no Inkluzaun, Armanda Berta dos Santos;

Ministra Edukasaun Juventude no Desportu, Dulce de Jesus Soares;

Ministru Ensinu Superiór, Siénsia no Kultura, Longuinhos dos Santos;

Ministru Agrikultura no Peskas, Joaquim José Gusmão dos Reis Martins;

Sekretáriu Estadu ba Komunikasaun Sosiál, Merício Juvinal dos Reis ‘Akara’;

Sekretáriu Estadu ba Protesaun Sivíl, Alexandrino Xavier Araújo;

Xefe Estadu Maiór Jenerál Forsas Armadas nian, Major Jenerál Lere Anan Timur;

Komandante Jerál Polísia Nasionál Timor-Leste, Faustino da Costa no

Diretór Sentru Integradu ba Jestaun Krize, Brigadeiru Jenerál Aluc.