Grupu Tékniku Serbisu nian atu responde ba impaktu husi inundasaun hirak ne’ebé akontese iha sidade Dili iha loron-sesta liubá, aprezenta ona ohin, loron 19 fulan-marsu tinan 2020, ba Konsellu Administrasaun Fundu Infraestruturas (KAFI), atu bele halo apresiasaun, lista detallada husi medida urjente sira ne’ebé presiza hodi hatán ba estragu hirak ne’ebé inundasaun ne’e kauza. Sorumutuk ne’e hala’o iha Palásiu Governu, iha Dili.

Nesesidade intervensaun ne’e ninia objetivu mak atu estabelese filafali funsionamentu estrada nian, kontinua fornese enerjia elétrika ho seguransa no garante reparasaun sistema abastesimentu bee ne’ebé naksobu ona, no, liuliu halo serbisu urjente sira atu hamoos drenajen, normaliza no hasai rai-henek husi mota sira no harii muru sira ne’ebé bele evita katak akontesimentu sira, hanesan akontesimentu iha loron 13 fulan-marsu liubá, bele mosu filafali, durante tempu udan ida-ne’e.

Durante sorumutuk ne’e, halo ona mós análize detallada kona-ba intervensaun hirak ne’ebé presiza no, tuir karakterístika husi projetu ida-idak ne’ebé maka atu realiza, membru KAFI nian sira halo avaliasaun kona-ba opsaun legál ida-idak ba prosesu aprovizionamentu. Projetu hotu-hotu hetan ona aprovasaun no sei finansia iha ámbitu Fundu Infraestruturas nian.

Husikedas loron-sesta liubá, asaun limpeza halo ona iha fatin oin-oin iha sidade laran no Institutu Jestaun Ekipamentu hahú ona obra reabilitasaun nian ne’ebé urjente liu.

Sekretaria Estadu Protesaun Sivíl fó ona apoiu emerjénsia nian ba sira ne’ebé afetadu husi inundasaun, liuliu liuhusi fahe sasán nesesidade bázika nian no lori sira ne’ebé lakon sira-nia hela-fatin ba hela iha sentru temporáriu sira.

Grupu Serbisu nian ne’e kompostu husi Diresaun Jerál Obras Públikas, ne’ebé lidera grupu ne’e liuhusi ninia Diretór-Jerál, no integra mós Ajénsia Dezenvolvimentu Nasionál, Diresaun Jerál Água no Saneamentu, Institutu Jestaun Ekipamentu sira, I.P. no Komisaun Nasionál Aprovizionamentu.

Partisipa iha sorumutuk ne’e maka Ministru Planeamentu no Investimentu Estratéjiku iha ezersísiu, Fidelis Manuel Leite Magalhães, Ministra Finansas iha ezersísiu, Sara  Lobo Brites, Ministru Obras Públikas, Salvador Soares dos Reis Pires, Ministru Transportes no Komunikasoins, José Agustinho da Silva, Diretór Sekretariadu Projetu Boot sira (SGP, sigla iha lian portugés), Krispim Fernandes, Diretór-Jerál Autoridade Nasionál Dezenvolvimentu (ADN), Samuel Marçal, Diretór-Jerál Komisaun Nasionál Aprovizionamentu, Aniceto do Rosário, Diretór-Jerál Água no Saneamentu, Gustavo da Cruz, Diretora Jerál Eletrisidade, Arlinda Miranda, Diretór-Jerál Obras Públikas, Rui Guterres, tékniku sira husi Ministériu Finansas no asesór jurídiku sira.