Governu diskute opsaun legál sira ba prosesu aprovizionamentu hodi hatán ba inundasaun sira

Konsellu Administrasaun Fundu Infraestruturas nian hala’o sorumutuk ohin, loron 18 fulan-marsu, ho Grupu Traballu atu hatán ba impaktu husi inundasaun sira ne’ebé akontese iha loron-sesta liubá, hodi debate kona-ba opsaun legál sira ba prosesu aprovizionamentu nian husi intervensaun sira ne’ebé presiza hodi hatán ba estragu sira ne’ebé provoka husi bee ne’ebé sa’e.

Nesesidade intervensaun ne’e ninia objetivu maka atu estabelese fila-fali funsionamentu estrada nia, kontinua fornese enerjia elétrika ho seguransa no garante reparasaun sistema abastesimentu bee moos ne’ebé naksobu ona, no, liuliu, halo serbisu urjente sira atu hamoos drenajen, normaliza no hasai rai-henek husi mota sira no harii muru sira ne’ebé bele evita katak akontesimentu sira, hanesan akontesimentu iha loron-sesta liubá ne’e, bele mosu filafali, durante tempu udan ida-ne’e.

Grupu Serbisu nian ne’e kompostu husi Diresaun Jerál Obras Públikas, ne’ebé lidera Grupu ne’e liuhusi ninia Diretór-Jerál, no integra mós Ajénsia Dezenvolvimentu Nasionál, Diresaun Jerál Água no Saneamentu, Institutu Jestaun Ekipamentu, I.P. no Komisaun Nasionál Aprovizionamentu.

Medida estraordinária hirak ne’ebé presiza ba reabilitasaun zona sira ne’ebé afetada husi inundasaun, debate ona mós iha sorumutuk Konsellu Ministrus ne’ebé hala’o ohin dadeer.

Grupu serbisu nian ne’e sei prepara lista detallada no razaun husi intervensaun urjente sira ne’ebé atu hala’o, atu tuirmai ninia prosesu aprovizionamentu hetan aprovasaun.

Partisipa iha sorumutuk ne’e maka Ministru Reforma Lejizlativa no Asuntus Parlamentares, Fidelis Manuel Leite Magalhães, iha Ministru Planeamentu no Investimentu Estratéjiku nia fatin, Ministra Finansas iha ezersísiu, Sara Lobo Brites, Ministru Obras Públikas, Salvador Soares dos Reis Pires, Ministru Transportes no Komunikasoins, José Agustinho da Silva, Diretór Sekretariadu Projetu  Boot sira (SGP), Krispim Fernandes, Diretór-Jerál Autoridade Nasionál Dezenvolvimentu (ADN), Samuel Marçal, Diretór-Jerál Komisaun Nasionál Aprovizionamentu, Aniceto do Rosário, Diretór-Jerál Água no Saneamentu, Gustavo da Cruz, Diretora-Jerál Eletrisidade nian, Arlinda Miranda, Diretór Jerál Obras Públikas, Rui Guterres no asesór jurídiku sira husi gabinete Primeiru-Ministru, Prezidénsia Konsellu Ministrus no Ministériu Obras Públikas.

url: http://timor-leste.gov.tl?lang=tp&p=23769